'ఎంహెచ్ కు ముంబై, టీఎస్ కు హైదరాబాద్, ఏపీకి చంద్రబాబు'!

ఇటీవల దావోస్ లో జరిగిన వరల్డ్ ఎకనామిక్ ఫోరం - 2025 సదస్సులో పాల్గొనడానికి భారతదేశం నుంచి పలు రాష్ట్రాల ముఖ్యమంత్రులు వెళ్లిన సంగతి తెలిసిందే. ఈ సందర్భంగా దేశం మొత్తం ఒక యూనిట్ గా పెట్టుబడులు రాబట్టే విధంగా కేంద్ర వాణిజ్య మంత్రిత్వ శాఖ నిర్వహించిన కంట్రీ స్ట్రాటజిక్ డైలాగ్ సమావేశంలో సీఎంలు పాల్గొన్నారు.

ఇందులో భాగంగా.. ఏపీ నుంచి చంద్రబాబు, మహారాష్ట్ర నుంచి దేవేంద్ర ఫడ్నవీస్, తెలంగాణ నుంచి రేవంత్ రెడ్డి పాల్గొన్న సంగతి తెలిసిందే. ఈ సమయంలో ఈ సభను ఉద్దేశించి మాట్లాడిన చంద్రబాబు పలు కీలక వ్యాఖ్యలు చేశారు. దావోస్ లో తన సీనియారిటీ గురించి, రాష్ట్రాభివృద్ధిలో తన విజన్ గురించి వివరించారు.

ఆ సమయంలో... మహారాష్ట్ర ముఖ్యమంత్రి దేవేంద్ర ఫడ్నవీస్ మరోసారి చంద్రబాబు విషయంలో ఆసక్తికర వ్యాఖ్యలు చేశారని అంటున్నారు. దావోస్ లో పాల్గొన్న అందరికంటే సీనియర్ పొలిటీషియన్, మోస్ట్ ఎక్ పీరియన్స్ సీఎం అయిన బాబు గురించి ఫడ్నవీస్ ఆసక్తికర వ్యాఖ్యలు చేశారని.. ఏపీకి బాబు ఉన్నారని అన్నారని కేంద్రమంత్రి రామ్మోహన్ తెలిపారు.

అవును... దావోస్ వేదికగా ఏపీ సీఎం చంద్రబాబు గురించి మహారాష్ట్ర ముఖ్యమంత్రి దేవేంద్ర ఫడ్నవీస్ స్పందిస్తూ... "మహారాష్ట్రకు ముంబై ఉండొచ్చు, తెలంగాణకు హైదరాబాద్ ఉండొచ్చు. కానీ.. ఏపీకి చంద్రబాబు ఉన్నారు.. ఆయన రాష్ట్రాన్ని అభివృద్ధి చేస్తారు" అని అన్నారని కేంద్రమంత్రి రామ్మోహన్ నాయుడు తెలిపారు.

మంగళగిరిలో ప్రజావేదికలో పాల్గొన్న అనంతరం స్పందిస్తూ.. చంద్రబాబు స్ఫూర్తికి ఫడ్నవీస్ వ్యాఖ్యలే నిదర్శనమని, ఆంధ్రప్రదేశ్ కి ఆయనే బ్రాండ్ అని కొనియాడారు. దావోస్ లో బాబు కష్టాన్ని, తపననూ దగ్గరుండి చూసినట్లు చెప్పిన రామ్మోహన్ నాయుడు.. మైనస్ 10 డిగ్రీల చలిలో కూడా పగలు రాత్రీ తేడా లేకుండా కష్టపడ్డారని అన్నారు.

ఇదే సమయంలో.. గత వైసీపీ ప్రభుత్వం వల్ల రాష్ట్రం వైపు కన్నెత్తి చూడని పారిశ్రామికవేత్తలు.. నేడు చంద్రబాబు ఉన్నారన్న ధైర్యంతో పెట్టుబడులూ పెట్టేందుకు సిద్ధమవుతున్నారని చెప్పుకొచ్చారు. ఇప్పుడు ఈ వ్యాఖ్యలు ఆసక్తిగా మారాయి.