బిగ్ బ్రేకింగ్... సంబరాలు స్టార్ట్ చేసిన ట్రంప్ మద్దతుదారులు!

అమెరికా అధ్యక్ష ఎన్నికల ఫలితాల్లో రిపబ్లికన్ పార్టీ అభ్యర్థి డొనాల్డ్ ట్రంప్ విజయం కన్ ఫాం అయిపోయింది! అధ్యక్ష ఎన్నికల్లో మొత్తం 538 ఎలక్టోరల్ ఓట్లలో మెజారిటీ మార్కు 270ని ఆయన చేరుకున్నారు. మరోపక్క కమలా హారిస్ ఇంకా 214 ఓట్ల వద్ద కొనసాగుతున్నారు. దీంతో... ట్రంప్ మద్దతుదారుల్లో సంబరాలు అంబరాన్నంటాయి.

అవును... అమెరికా అధ్యక్ష ఎన్నికల్లో ట్రంప్ విజయం ఖరారైంది! దీంతో... ఆయన రెండోసారి అధ్యక్ష పీఠం ఎక్కేందుకు రంగం సిద్ధం చేసుకుంటున్నారు. ఈ సమయంలో కాసేపట్లో తన మద్దతుదారులను ఉద్దేశించి ట్రంప్ ప్రసంగించనున్నారని తెలుస్తోంది. మరోవైపు ఓటమి నేపథ్యంలో హారిస్ తన ప్రసంగాన్ని రద్దు చేసుకున్నట్లు ప్రకటించారు.

వాస్తవానికి హార్వర్డ్ యూనివర్శిటీ వాచ్ పార్టీలో కమలా హారిస్ ప్రసంగించాల్సి ఉంది. అయితే.. ఆమె తర్వాత రోజు మాట్లాడతారని కమలా హారిస్ ప్రచార టీం మెంబర్ సెడిక్ రిచ్మండ్ వెల్లడించారు. ఈ సమయంలో పలు చోట్ల ట్రంప్ మద్దతుదారులు సంబరాలు స్టార్ట్ చేసారు. తమదైన శైలిలో హల్ చల్ చేస్తున్నారని అంటున్నారు.

కాగా... అధికారం చేజిక్కించుకోవడానికి కీలకమైన స్వింగ్ స్టేట్స్ అయిన జార్జియా, పెన్సిల్వేనియా, నార్త్ కరోలినా రాష్ట్రాలను ట్రంప్ సొంతం చేసుకున్నారు. దీంతో పాటు మరో నాలుగు స్వింగ్ స్టేట్స్ లోనూ ఆధిక్యంలో కొనసాగుతున్నారు. దీంతో... అగ్రరాజ్యం అమెరికా అధ్యక్షుడిగా ట్రంప్ రెండోసారి ప్రమాణ స్వీకారం చేయబోతున్నారు!!