స్టార్ ఫ్యామిలీ... కుటుంబం మొత్తం కలిసి 630 లీటర్ల రక్తదానం!

రక్తదానం చేయండి ప్రాణదాతలు అవ్వండి అనేది చాలా మందికి తెలిసిన విషయమే. అయినప్పటికీ చాలా మందిలో రక్తదానంపై ఉన్న అవగాహన అంతంతమాత్రమె కాగా.. మరికొంతమందికి ఇప్పటికీ రక్తదానం చేస్తే తమకేదో నష్టం జరుగుతుందనే అపోహ కూడా ఉంది! ఈ సమయంలో ఓ కుటుంబం మాత్రం ఈ విషయంలో అందరికీ ఆదర్శంగా నిలుస్తోంది.

అవును... రక్తదానం అంటే ప్రాణదానం అని అంటారు. ప్రతీ ఆరు నెలలకూ రక్తదానం చేయడం మంచి ఆలొచన అని చెబుతుంటారు. చాలా మంది దీన్ని ఆచరిస్తుంటారు!.. మరికొంతమంది మాత్రం ఇప్పటికీ అపోహల మాటున కాలం వెళ్లదీస్తుంటారు. ఈ సమయంలో గుజరాత్ కు చెందిన ఓ కుటుంబం మాత్రం పదుల సంఖ్యలో రక్తదానాలు చేస్తుంది.

వివరాళ్లోకి వెళ్తే... గుజరాత్ రాష్ట్రం, అహ్మదాబాద్ లోని మణేక్ బాగ్ ప్రాంతానికి చెందిన ఓ పటేల్ కుటుంబం ఉంది. ఈ కుటుంబంలో 27 మంది సభ్యులు ఉన్నారు. వీరిలో 16 మంది ఇప్పటివరకూ 50 సార్లకు పైనే రక్తదానం చేశారు. ఇక 100 ఏళ్లకు దగ్గరగా ఉన్న నలుగురైతే ఇప్పటివరకూ 100 సార్లకు పైనే రక్తం ఇచ్చారు.

ఇలా ఆ కుటుంబం మొత్తంగా 1,400 యూనిట్ల రక్తం దానమిచ్చింది. అంటే... వీరంతా కలిసి ఇప్పటివరకూ 630 లీటర్ల వరకూ రక్తం దానం చేశారన్నమాట! ఈ మేరకు స్థానిక మీడియా కథనాలు ఈ విషయాలు వెల్లడించాయి. ఇదే సమయంలో... ఇదే ప్రాంతానికి చెందిన మలవాంకర్ ఫ్యామిలీ 356 లీటర్ల రక్తదానం చేసినట్లు చెబుతున్నారు.

నేడు జాతీయ స్వచ్ఛంద రక్తదాన దినోత్సవాన్ని పురస్కరించుకొని అహ్మదాబాద్ లో రక్తదాతలను అభినందిస్తూ కార్యక్రమం నిర్వహించారు. ఈ కార్యక్రమంలో ఇలాంటి రక్తదాతలను అభినందించారు. వీరంతా ఇప్పటివరకూ ఎన్నో ప్రాణాలు కాపాడారని తెలిపారు.