రామ్మూర్తినాయుడి కర్మక్రియలు దగ్గరుండి నిర్వహించిన చంద్రబాబు!

ఆంధ్రప్రదేశ్ ముఖ్యమంత్రి చంద్రబాబు నాయుడి సోదరుడు నారా రామ్మూర్తి నాయుడు హైదరాబాద్ లోని ఓ ప్రైవేటు ఆసుపత్రిలో చికిత్స పొందుతున్న కార్డియక్ అరెస్ట్ తో నవంబర్ 16న ఉదయం కన్ను మూసిన సంగతి తెలిసిందే. ఈ సమయంలో నేడు (నవంబర్ 28)న ఆయన కర్మక్రియలు నారావారిపల్లెలో జరిగాయి.

అవును... నారావారిపల్లెలో రామ్మూర్తినాయుడి కర్మక్రియలు నేడు జరిగాయి. ఈ కర్మక్రియలు ఆంధ్రప్రదేశ్ ముఖ్యమంత్రి చంద్రబాబు, కుటుంబ సభ్యులు దగ్గరుండి నిర్వహించారు. ఈ కార్యక్రమానికి చంద్రబాబుతో పాటు ఆయన సతీమణి భువనేశ్వరి, మంత్రి లోకేష్ తో పాటు నారా కుటుంబసభ్యులు హాజరయ్యారు.

రామ్మూర్తినాయుడి కుమారుడు, సినీ నటుడు నారా రోహిత్ ఈ కర్మక్రియలు నిర్వహించారు. ఈ కార్యక్రమానికి మంత్రులు అచ్చెన్నాయుడు, వంగలపూడి అనిత, నిమ్మల రామానాయుడు, అనగాని సత్యప్రసాద్, వాసంశెట్టి సుభాష్, మొదలైనవారితో పాటు పలువురు టీడీపీ ఎమ్మెల్యేలు, నేతలు, అభిమానులు, కార్యకర్తలు హాజరయ్యారు.

కాగా, రామ్మూర్తినాయుడు ఈ నెల 16న హైదరాబాద్ లోని ఓ ప్రైవేటు ఆసుపత్రిలో తుదిశ్వాస విడిచిన సంగతి తెలిసిందే. ఆయనకు భార్య ఇందిర, కుమారులు నారా గిరీశ్, నారా రోహిత్ ఉన్నారు. 1992లో ప్రత్యక్ష రాజకీయాల్లోకి వచ్చిన రామ్మూర్తినాయుడు 1994లో చంద్రగిరి నుంచి పోటీచేసి 16 వేలకు పైగా మెజారిటీతో గెలుపొందారు.