రేవంత్ కు ఫ్రీ హ్యాండ్.. గెలుపు గుర్రాలు ఎంపిక ఆయనదే

అనూహ్య విజయాన్ని అందించి.. పదేళ్ల కలను సాకారం చేసిన తెలంగాణ రాష్ట్ర ముఖ్యమంత్రి రేవంత్ రెడ్డిపై కాంగ్రెస్ అధిష్ఠానం అదిరే ఆఫర్ ఇచ్చేసింది. మరికొద్ది రోజుల్లో జరిగే లోక్ సభ ఎన్నికల్లో పార్టీ తరఫు పోటీ చేసే గెలుపు గుర్రాల్ని డిసైడ్ చేసే గురుతుర బాధ్యతను ఆయనకు అప్పజెప్పటమే కాదు.. అభ్యర్థుల ఎంపికలో ఆయనకు ఫ్రీ హ్యాండ్ ఇచ్చేస్తూ నిర్ణయం తీసుకున్నట్లు చెబుతున్నారు. రోటీన్ కు భిన్నంగా రేవంత్ కు మరింత స్వేచ్ఛను ఇచ్చేందుకు వీలుగా రాహుల్ అండ్ కో ఈ నిర్ణయాన్ని తీసుకున్నట్లు చెబుతున్నారు.

ముఖ్యమంత్రి రేవంత్ రెడ్డి.. ఉప ముఖ్యమంత్రి భట్టి విక్రమార్క్త తో కాంగ్రెస్ పార్టీ సంస్థాగత వ్యవహారాల ప్రధాన కార్యదర్శి కేసీ వేణుగోపాల్ సుదీర్ఘంగా చర్చలు జరిపారు. తెలంగాణలోని ఏయే నియోజకవర్గాల్లో ఎవరెవరు గెలిచే అవకాశాలు ఉన్నాయన్న విషయాలపై చర్చలు జరిగాయి. ఈ మేరకు తాను చేసిన కసరత్తును వేణుగోపాల్ కు ముఖ్యమంత్రి రేవంత్ వివరించినట్లుగా తెలుస్తోంది.

ఈ సందర్భంగా ముఖ్యమంత్రి రేవంత్ నుంచి వచ్చిన విషయాల పట్ల ఉప ముఖ్యమంత్రి భట్టి ఏకాభిప్రాయాన్ని వ్యక్తం చేసినట్లుగా సమాచారం. అంతేకాదు తాము కానీ గేట్లు ఎత్తుతే.. బీఆర్ఎస్ ఖాళీ అయ్యే అవకాశం ఉందన్న విషయాన్ని పేర్కొన్నట్లుగా తెలుస్తోంది. బీఆర్ఎస్ ప్రజల్లో పట్టు కోల్పోతుందని.. ఆ పార్టీ నుంచి అనేక మంది కాంగ్రెస్ లో చేరేందుకు సిద్ధంగా ఉన్నారని.. వారి విషయంలో తాము ఏం చేయాలో దిశానిర్దేశం చేయాలని రేవంత్ కోరినట్లుగా తెలుస్తోంది.

తాము గేట్లు తెరిస్తే.. లోక్ సభ ఎన్నికల్లో ఆ పార్టీ ఒక్క సీటు కూడా గెలిచే అవకాశం లేదని.. అందుకే బీజేపీతో కాళ్ల బేరానికి ప్రయత్నిస్తున్నట్లుగా చెప్పినట్లు తెలుస్తోంది. మంత్రివర్గ విస్తరణ లోక్ సభ ఎన్నికల తర్వాతే నిర్ణయిద్దామని చెప్పినట్లుగా సమాచారం. కొన్ని నామినేటెడ్ పోస్టులపై వేణుగోపాల్ లో రేవంత్.. భట్టిలు చర్చించినట్లుగా చెబుతున్నారు.

తాజాగా ముగిసిన అసెంబ్లీ సమావేశాల్లో బీఆర్ఎస్ సర్కారు అవినీతి కళ్లకు కట్టినట్లుగా ప్రజలకు తెలియజేయటంలో సక్సెస్ అయినట్లుగా చెప్పినట్లు తెలిసింది. ప్రధాన ప్రతిపక్ష నేతగా ఉండి కూడా కేసీఆర్ సభకు రాకపోవటం కాంగ్రెస్ నైతిక విజయమన్న రీతిలో అధిష్ఠానం వద్ద చెప్పినట్లుగా తెలుస్తోంది. లోక్ సభ ఎన్నికలకు సంబంధించి రేవంత్.. భట్టి ఏకాభిప్రాయంతో ఉన్న నేపథ్యంలో.. రేవంత్ కు మరింత ఫ్రీ హ్యాండ్ ఇవ్వటంతో పాటు.. అభ్యర్థుల ఎంపికలోనే ఆయనకు స్వేచ్ఛ ఇవ్వనున్న విషయాన్ని తెలియజేసినట్లుగా చెబుతున్నారు.