ఆ 45 రోజులు.. చంద్రబాబు మాస్టర్‌ ప్లాన్‌!
ఆంధ్రప్రదేశ్‌ లో వచ్చే ఎన్నికల్లో అధికారం సాధించడమే లక్ష్యంగా టీడీపీ అధినేత చంద్రబాబు పావులు కదుపుతున్నారు.
ఆంధ్రప్రదేశ్‌ లో వచ్చే ఎన్నికల్లో అధికారం సాధించడమే లక్ష్యంగా టీడీపీ అధినేత చంద్రబాబు పావులు కదుపుతున్నారు. ఓవైపు ఆయన రాష్ట్రంలో చురుగ్గా పర్యటనలు చేస్తున్నారు. మరోవైపు ఆయన తనయుడు నారా లోకేశ్‌ యువగళం పాదయాత్ర చేస్తున్నారు. ప్రస్తుతం పశ్చిమ గోదావరి జిల్లాలో లోకేశ్‌ పాదయాత్ర కొనసాగుతోంది. 200 రోజుల పాదయాత్రను లోకేశ్‌ ముగించుకున్నారు. దాదాపు మరో 200 రోజులపాటు ఆయన పాదయాత్ర కొనసాగనుంది.
కాగా రాజమండ్రిలో ఈ ఏడాది మేలో నిర్వహించిన టీడీపీ మహానాడులో చంద్రబాబు పలు పథకాలను ప్రకటించారు. తాము అధికారంలోకి వస్తే వాటిని అమలు చేస్తామన్నారు. ఈ నేపథ్యంలో ‘బాబు ష్యూరిటీ– భవిష్యత్తుకు గ్యారెంటీ’ పేరుతో 45 రోజులపాటు ప్రత్యేక కార్యక్రమం నిర్వహించాలని చంద్రబాబు నిర్ణయించారు.
ఈ కార్యక్రమంలో భాగంగా సెప్టెంబర్‌ 2 శనివారం నుంచి 45 రోజులపాటు టీడీపీ అధినేత చంద్రబాబుతోపాటు అన్ని నియోజకవర్గాల ఇంచార్జులు, టీడీపీ ముఖ్య నేతలు ప్రజలను కలుసుకుంటారు. టీడీపీ అధికారంలోకి వస్తే ఏం చేస్తుందో ప్రజలకు వివరిస్తారు. తాము అధికారంలోకి వస్తే ‘సూపర్‌ సిక్స్‌’ పథకాలను అమలు చేస్తామని ఇప్పటికే చంద్రబాబు ప్రకటించారు. మహిళలకు ఉచిత బస్సు ప్రయాణం, మహిళలకు మూడు గ్యాస్‌ సిలిండర్లు, పాఠశాలల్లో చదువుకునే పిల్లలు కుటుంబంలో ఎంతమంది ఉన్నా ఒక్కొక్కరికి రూ.15000, రైతులకు రూ.20 వేల ఆర్థిక సాయం, 18 – 45 ఏళ్ల మధ్య మహిళలకు నెలకు రూ.1500, నిరుద్యోగులకు భృతి కింద నెలకు రూ.3 వేలు ఇస్తామని చంద్రబాబు వెల్లడించిన సంగతి తెలిసిందే.
ఈ నేపథ్యంలో సెప్టెంబర్‌ 2 నుంచి 45 రోజులపాటు రాష్ట్రంలో టీడీపీ నియోజకవర్గాల ఇంచార్జులు, ముఖ్య నేతలు పర్యటిస్తారు. నేరుగా ప్రజల వద్దకే వెళ్లి తాము తీసుకువచ్చే పథకాల గురించి వివరిస్తారు. అంతేకాకుండా చంద్రబాబు సంతకం చేసిన ఒక పత్రాన్ని కూడా గ్యారెంటీగా ప్రజలకు ఇస్తారు. టీడీపీకి ఓటేసి గెలిపించాలని విజ్ఞప్తి చేస్తారు.
ఇక చంద్రబాబు సైతం రాష్ట్రంలో 35 నియోజకవర్గాల్లో స్వయంగా పర్యటిస్తారు. నేరుగా ప్రజలను కలిసి టీడీపీకి ఓటేయాలని విజ్ఞప్తి చేస్తారు. అధికారంలోకి రాగానే సూపర్‌ సిక్స్‌ పథకాలను అమలు చేస్తామని ష్యూరిటీ ఇవ్వనున్నారు. ఇలా టీడీపీ నేతలు మొత్తం 3 కోట్ల మంది ప్రజలను నేరుగా కలుసుకునేలా ఈ 45 రోజుల కార్యక్రమం చేపట్టారు.
బాబు ష్యూరిటీ – భవిష్యత్తుకు గ్యారెంటీ కార్యక్రమంలో భాగంగా చంద్రబాబు సెప్టెంబర్‌ 2న కాకినాడలో పర్యటిస్తారు. సెప్టెంబర్‌ 3న
ఉమ్మడి తూర్పుగోదావరి, పశ్చిమగోదావరి జిల్లాల్లో ప్రజలను కలుస్తారు. ఆ జిల్లాల్లోని 5 లోక్‌ సభ నియోజకవర్గాల ఇంచార్జిలు, ముఖ్య నాయకులు కూడా ఆయనతో పాల్గొంటారు. 5 నుంచి 9వ తేదీ వరకు ఉమ్మడి అనంతపురం, కర్నూలు జిల్లాల్లోని రాయదుర్గం, అనంతపురం, బనగానపల్లె, పాణ్యం తదితర నియోజకవర్గాల్లో చంద్రబాబు పర్యటిస్తారు. ఇంటింటికీ వెళ్లి తొలివిడత మేనిఫెస్టోలో ప్రకటించిన సూపర్‌ సిక్స్‌ పథకాల గురించి వివరిస్తారు.
కాగా ఈ నాలుగున్నరేళ్లలో చంద్రబాబు ఇప్పటికే 145 నియోజకవర్గాల్లో పర్యటించారు. ఈ నేపథ్యంలో మిగిలిన 30 నియోజకవర్గాలను కూడా ఆయన కవర్‌ చేయనున్నారు. ఈ కార్యక్రమంలో భాగంగా పార్టీ బూత్‌ స్థాయి కార్యకర్తలు, యూనిట్, క్లస్టర్, నియోజకవర్గ ఇంచార్జిల వరకు ఒక్కో బూత్‌ లో రోజుకి 10 ఇళ్లకు వెళ్లేలా కార్యాచరణ ప్రణాళికను సిద్ధం చేశారు.
ఇలా ప్రతి నియోజకవర్గంలో కనీసం 2 లక్షల మంది ఓటర్లను కలవాలన్నది టీడీపీ ప్రణాళిక సిద్ధం చేసింది. ఇందులో భాగంగానే ‘ప్రజావేదిక’ పేరుతో ప్రతి 5 వేల మంది ప్రజలకు ఒకటి చొప్పున నియోజకవర్గ ఇంచార్జిలు వివిధ సామాజికవర్గాల వారీగా సమావేశాలను కూడా నిర్వహిస్తారు. మొత్తం మీద వచ్చే ఎన్నికల్లో విజయం సాధించి అధికారం చేపట్టడమే లక్ష్యంగా చంద్రబాబు చేపడుతున్న ఈ యాత్ర విజయాన్ని కట్టబెడుతుందో, లేదో వేచిచూడాలి.