కెనడాకు షాకిచ్చిన ట్రంప్.. యూఎస్ కు కౌంటర్ ఇచ్చిన ట్రూడో!

అమెరికా అధ్యక్షుడిగా బాధ్యతలు చేపట్టిన తర్వాత డొనాల్డ్ ట్రంప్ తన్నదైన నిర్ణయాలు తీసుకుంటున్న సంగతి తెలిసిందే. ట్రంప్ తీసుకుంటున్న నిర్ణయాలు ప్రపంచదేశాల్లో తీవ్ర చర్చనీయాంశంగా మారుతున్నాయి. ఈ సమయంలో కొన్ని దేశాలు తీవ్ర ఆందోళన కూడా వ్యక్తం చేస్తున్నాయి. ఎదురుతిరిగిన కొలంబియా వంటి దేశాలకు ట్రంప్ సుంకాలతో షాకిచ్చి దారిలోకి తెచ్చుకుంటున్నారు.

ఈ విషయంలో మిత్రదేశం, శత్రుదేశం, న్యూట్రల్ దేశం అనే తేడాలు లేకుండా ట్రంప్ తనదైన దూకుడు ప్రదర్శిస్తున్నారు. ఈ నేపథ్యంలో ప్రధానంగా మొదటి నుంచీ కెనడా, మెక్సికో దేశాల పేర్లు ప్రస్థావిస్తూనే ఉన్నారు. ఈ క్రమంలో తాజాగా కెనడాకు షాకిస్తూ ట్రంప్ నిర్ణయం తీసుకున్నారు. అయితే.. అదే స్థాయిలో యూఎస్ కు కెనడా కౌంటర్ ఇవ్వడం గమనార్హం.

అవును... రెండో సారి అధికారం చేపట్టిన డొనాల్డ్ ట్రంప్ తన పాలనలో సంచలన నిర్ణయాలు తీసుకుంటున్న సంగతి తెలిసిందే. ఇందులో ప్రధానంగా.. సుంకాల విషయంలో ఏమాత్రం తగ్గేదేలే అన్నట్లుగా వ్యవహరిస్తున్నారు. ఇందులో భాగంగా... కెనడా, మెక్సికోలపై తాను చేసిన వ్యాఖ్యలను నిజం చేస్తున్నారు.. ఆ మేరకు తాజాగా కీలక నిర్ణయం తీసుకున్నారు.

ఇందులో భాగంగా... కెనడా, మెక్సికోలపై సుంకాలు విధించే ఉత్తర్వ్యులపై తాజాగా అమెరికా అధ్యక్షుడు డొనాల్డ్ ట్రంప్ సంతకం చేశారు. ఈ సందర్భంగా సోషల్ మీడియాలో పోస్ట్ పెట్టిన ట్రంప్... నేడు కెనడా, మెక్సికో దిగుమతులపై 25 శాతం, చైనాపై 10 శాతం సుంకాల అమలుకు సంతకం చేసినట్లు తెలిపారు.

ఫెంటనిల్ తో సహా తమ దేశ పౌరులను చంపే చట్టవిరుద్ధమైన, ప్రాణాంతకమైన మాదక ద్రవ్యాల ముప్పు కారణంగానే ఈ నిర్ణయం తీసుకున్నట్లు తెలిపారు. తనకు అమెరికన్లను రక్షించాల్సిన అవసరం ఉందని చెప్పుకొచ్చారు. అందరికీ భద్రత కల్పించడం అధ్యక్షుడిగా తన బాధయ్త అని.. చట్టవిరుద్ధ వలసదారులను, డ్రగ్స్ ను తమ సరిహద్దుల్లోకి రాకుండా చేస్తానని వెల్లడించారు.

ఈ మేరకు తాను ఎన్నికల ప్రచారంలో మాటిచ్చానని చెప్పిన ట్రంప్.. ఆ మాటకు కట్టుబడి ఉన్నట్లు తెలిపారు. ఈ మేరకు సోషల్ మీడియా వేదికగా పోస్టు పెట్టారు.

కెనడా కౌంటర్!:

ఇలా తమ దేశం వస్తువులపై అమెరికా అధ్యక్షుడు డొనాల్డ్ ట్రంప్ 25 శాతం సుంకాలు విధించడంపై కెనడా స్పందించింది. కెనడా దిగుమతులపై ట్రంప్ టారిఫ్ విధించిన గంటల్లోనే కెనడా ప్రధాని జస్టిన్ ట్రూడో కౌంటర్ ఇచ్చారు. ఇందులో భాగంగా... 155 బిలియన్ డాలర్ల యూఎస్ వస్తువులపై 25 శాతం సుంకాలు విధించనున్నట్లు ప్రకటించారు.

కెనడియన్ ఎనర్జీ ప్రొడక్ట్స్ మినహా కెనడా, మెక్సికో నుంచి దిగుమతయ్యే అన్ని వస్తువులపై ట్రంప్ 25 శాతం పన్ను విధించిన నేపథ్యంలో ఈ కీలక నిర్ణయం తీసుకున్నట్లు తెలిపారు.