ఇప్పుడో వీడియో సోషల్ మీడియాలో విపరీతంగా వైరల్ అవుతోంది. ఎవరో గుర్తు తెలీని ఒక యువకుడి సాయం కమ్ సాహసం అందరిని ఆకట్టుకుంటోంది. వివరాలు తెలీని ఈ హీరో ఎవరో తెలీదు కానీ.. అందరి మనసును దోచుకుంటున్నాడు. ఇటీవల కురిసిన భారీ వర్షాల కారణంగా చెన్నై మహానగరం తడిచి ముద్దైపోయిన సంగతి తెలిసిందే.
భారీగా కురిసిన వర్షం కారణంగా పలుచోట్ల రోడ్లు అన్నీ జలమయం అయ్యాయి. లోతట్టు ప్రాంతాలు అయితే చెరువుల మాదిరిగా మారిపోయాయి. దీంతో.. జనజీవనం స్తంభించింది. రోడ్ల మీద వాహనాలు ఆగిపోయాయి. మోకాళ్లకు పైనే నిలిచిన నీళ్లు రోడ్ల మీద చేరిపోయాయి. ఇలాంటి పరిస్థితుల్లో చెన్నైలోని తిలైగంగనగర్ సబ్ వే దగ్గర ఒక వృద్ధురాలు రోడ్డు పక్కన ఆగిన బస్సులో ఉండిపోయింది.
బిక్కుబిక్కున సాయం కోసం చూస్తున్న ఆమెను.. ఎవరూ పట్టించుకోని పరిస్థితి. ఇలాంటి సమయంలో ఎక్కడ నుంచి వచ్చాడో తెలీదు కానీ.. ఒక వ్యక్తి వచ్చాడు. బస్సులోకి వెళ్లి వృద్ధురాల్ని చేతుల్లోకి తీసుకొని మోసుకుంటూ బస్సులో నుంచి బయటకు వచ్చాడు.
అతగాడి నడుము లోతుగా రోడ్ల మీద నీళ్లు ఉన్న పరిస్థితి. ఇలాంటి పరిస్థితుల్లో ఎలాంటి భయం లేకుండా సదరు వృద్ధురాలిని కాపాడిన తీరు వీడియో రూపంలో బయటకు వచ్చింది. ఎత్తైన భవనాల మీద నిలబడి సదరు వృద్ధురాలిని కాపాడిన తీరును అక్కడున్న వారి చప్పట్లు కొడుతూ.. అభినందనలు తెలిపారు. ఇప్పుడీ వీడియో వైరల్ అవుతూ అందరి దృష్టిని ఆకర్షిస్తోంది.