కోహ్లీ.. నీ బెదిరింపులకు ఎవ్వరూ భయపడరు.. ఆట మీద దృష్టి పెట్టు! సెహ్వాగ్​ సెటైర్లు

టీం ఇండియా మాజీ డాషింగ్​ ఓపెనర్​ వీరేంద్ర సెహ్వాగ్.. విరాట్​ కోహ్లీపై ఓ రేంజ్​లో ఫైర్​ అయ్యాడు. కోహ్లీ బెదిరింపులు, కవ్వింపు చర్యలు పక్కనపెట్టి ఆటమీద దృష్టి పెడితే బాగుంటుందని హితవు పలికాడు. మరోవైపు ముంబై ఇండియన్స్ స్టార్ బ్యాట్స్‌మెన్ సూర్యకుమార్ యాదవ్‌పై ప్రశంసల జల్లు కురిపించాడు. రాయల్ చాలెంజర్స్ బెంగళూరుతో జరిగిన మ్యాచ్‌లో సూర్య అద్భుతంగా ఆడాడు. అయితే ఈ మ్యాచ్​లో విరాట్​కోహ్లి... సూర్యకుమార్​ను కవ్వించాడు. 13వ ఓవర్‌లో సూర్య ఓ బంతిని కోహ్లి వైపు కొట్టాడు. బంతిని పట్టుకున్న సూర్యకుమార్‌ యాదవ్‌ వద్దకు వచ్చి కవ్వింపు చర్యలకు దిగాడు. అవేమీ పట్టించుకోని సూర్య కుమార్ యాదవ్ తన ఆటతోనే బదులిచ్చాడు.

ఈ విషయాన్నే వీరు ప్రస్తావించాడు. ‘సూర్యకుమార్​ ఎవరి బెదిరింపులకు భయపడడు.. అతడు తన ఆటతోనే అందరికీ సమాధానం ఇస్తాడు. ఈ విషయం ఇప్పటికే కోహ్లికి అర్థమై ఉంటుంది.’ అంటూ పంచ్​లు వేశాడు సెహ్వాగ్​. సూర్యకుమార్‌ యాదవ్‌కు భారత జట్టులో చోటు దక్కడం గురించి మాట్లాడుతూ.. ‘అతడికి భవిష్యత్తులో కచ్చితంగా అవకాశం వస్తుంది. ఐపీఎల్​లో రాణించిన ఎందరో క్రికెటర్లు భారతజట్టులో అవకాశం దక్కించుకున్నారు. అందుకు వరుణ్‌ చక్రవర్తే ఉదాహరణ’ అంటూ వీరు తనదైన శైలిలో వ్యాఖ్యానించాడు. ఏది ఏమైనా ఐపీఎల్​ 2020 మాత్రం చాలా హాట్​హాట్​గా సాగుతున్నది. రోజుకు మలుపు తిరుగుతూ ఉత్కంఠగా సాగుతున్నది.