12 ఏళ్ల తర్వాత 6 పరుగులకే క్లీన్ బౌల్డ్..కోహ్లి ఆఫ్ స్టంప్ ఎగిరింది
రైల్వేస్ కు చెందిన పేస్ బౌలర్ 29 ఏళ్ల కుడిచేతి వాటం పేస్ బౌలర్ హిమాన్షు సాంగ్వాన్ బౌలింగ్ లో క్లీన్ బౌల్డ అయ్యాడు.
రోహిత్ శర్మ సంగతి తేలిపోయింది.. రిషభ్ పంత్ కథ తెలిసిపోయింది.. శుబ్ మన్ గిల్ ఫామ్ అర్థమైంది.. ఇక మిగిలింది విరాట్ కోహ్లి.. టీమ్ ఇండియా స్టార్ బ్యాటర్ 12 ఏళ్ల తర్వాత రంజీ ట్రోఫీ బరిలో దిగితే ఎలా ఆడతాడో చూద్దామని.. సొంతగడ్డపై ఎలా చెలరేగుతాడోనని అనుకుంటే తీవ్రంగా నిరాశపరిచాడు. 2013 అనంతరం రంజీ ట్రోఫీ ఆడుతున్న కోహ్లి పట్టుమని పది పరుగులు చేయలేకపోయాడు. మూడు ఓవర్లు కూడా ఆడలేకపోయాడు.. ఒక్కటే బౌండరీ కొట్టగలిగాడు.
న్యూజిలాండ్ పై స్వదేశంలో, ఆస్ట్రేలియాలో ఆస్ట్రేలియాపై తీవ్రంగా విఫలమైన విరాట్ కోహ్లి.. టెస్టుల్లో ఇక వీడ్కోలు పలకడం ఉత్తమం అన్న అభిప్రాయం వ్యక్తం అవుతున్న విరాట్ కోహ్లి.. ఖాళీగా ఉంటే రంజీ ట్రోఫీలు ఆడక తప్పదన్న బీసీసీఐ ఆదేశంతో బరిలో దిగినా ఫలితం మాత్రం అదే. పేలవ ఫామ్ తో తంటాలు పడుతూ.. 15 బంతులాడి 6 పరుగులకే ఔటయ్యాడు.
రైల్వేస్ కు చెందిన పేస్ బౌలర్ 29 ఏళ్ల కుడిచేతి వాటం పేస్ బౌలర్ హిమాన్షు సాంగ్వాన్ బౌలింగ్ లో క్లీన్ బౌల్డ అయ్యాడు. ఆఫ్ స్టంప్ పై పడిన బంతిని డ్రైవ్ ఆడే క్రమంలో కోహ్లి బౌల్డయ్యాడు.
పదివేల మంది వస్తే..
కోహ్లి బ్యాటింగ్ చూద్దామని పదివేల మంది అభిమానులు ఢిల్లీలోని అరుణ్ జైట్లీ స్టేడియానికి వస్తే వారిని కోహ్లి తీవ్రంగా నిరాశపరిచాడు. సాంగ్వాన్ కచ్చితమైన లైన్‌ అండ్‌ లెంగ్త్‌ లో వేసిన బంతిని ఎదుర్కొనడంలో కోహ్లి తేలిపోయాడు.
కాగా, ఢిల్లీకి గత మ్యాచ్ లోనే కోహ్లి ఆడతాడని భావించిన కోహ్లి మెడ నొప్పితో దూరమైన సంగతి తెలిసిందే. ఇప్పుడు రైల్వేస్ తో మ్యాచ్ బరిలో దిగాడు. దీనికిముందు వికెట్ కీపర్ బ్యాటర్ పంత్ (ఢిల్లీ), కెప్టెన్ రోహిత్ శర్మ, ఓపెనర్ యశస్వి జైస్వాల్ (ముంబై) పెద్దగా పరుగులు చేయలేదు. గిల్ మాత్రం పంజాబ్ తరఫున ఆడుతూ రెండో ఇన్నింగ్స్ లో సెంచరీ కొట్టాడు.