రేర్ రికార్డ్‌: సినిమా బ‌డ్జెట్ 6ల‌క్ష‌లు.. వ‌సూళ్లు 800కోట్లు!

ప్రపంచంలో అత్యంత లాభదాయకమైన చిత్రం ఏది? ఈ ప్ర‌శ్న‌కు స‌మాధానం ఇప్ప‌టికే తెలిసిన‌దే. కొన్నేళ్లుగా బాక్సాఫీస్ వద్ద అనేక చిన్న బడ్జెట్ చిత్రాలు విడుద‌లై అసాధార‌ణ విజ‌యాలు సాధించాయి. భారతదేశం ఓవర్సీస్ రెండు చోట్లా అనేక చిన్న బడ్జెట్ చిత్రాలు బ్లాక్‌బస్టర్‌లుగా మారాయి. నిజానికి కాశ్మీర్ ఫైల్స్ ఇటీవల రూ. 15 కోట్ల బడ్జెట్‌లో తెర‌కెక్కి రూ. 341 కోట్లు ఆర్జించినప్పుడు 2000 శాతం లాభాన్ని నమోదు చేయ‌డం సంచ‌ల‌నంగా భావించారు. కానీ 2007లో ఒక హాలీవుడ్ చిత్రం నమోదు చేసిన ఆశ్చర్యకరమైన రికార్డుతో పోలిస్తే ఇది చాలా చిన్న‌ది. దాదాపు 13,30,000 శాతం లాభం సాధించిన ఆ సినిమాతో పోలిస్తే కాశ్మీర్ ఫైల్స్ కానీ ఇంకేదైనా భార‌తీయ చిన్న బ‌డ్జెట్ సినిమా కానీ దాని ద‌రిదాపుల్లోనే లేవు.

వ‌ర‌ల్డ్ బెస్ట్ గా నిలిచిన ఆ చిన్న సినిమా ఏది? అన్న‌ది పరిశీలిస్తే... 2007లో విడుద‌లైన హార‌ర్ సినిమా `పారానార్మల్ యాక్టివిటీ` తక్కువ-బడ్జెట్ లో తెర‌కెక్కి అసాధార‌ణ విజ‌యం సాధించింది. చిత్రనిర్మాత ఓరెన్ పెలీ ఈ సినిమాని చిత్రీకరించాడు. దానికి ఆయ‌నే ద‌ర్శ‌క‌ర‌చ‌యిత‌... నిర్మాత‌. నిజానికి 1999 హిట్ `ది బ్లెయిర్ విచ్` అప్ప‌టికి ఒక సంచ‌ల‌నం. ఈ సినిమాని అనుక‌రిస్తూ లైవ్ ఫార్మాట్ లో దొరికిన ఫుటేజ్ ఆకృతిని ఉపయోగించి తీసిన చిత్రం పారానార్మ‌ల్ యాక్టివిటీ. పూర్తిగా హ్యాండ్‌హెల్డ్ కెమెరాలు CCTV కెమెరాల్లో చిత్రీక‌రించిన సినిమా ఇది.

ఈ చిత్రంలో ఒక‌ అస్థిపంజరం కేవలం నలుగురు తారాగణం మాత్ర‌మే క‌నిపిస్తారు. బడ్జెట్ కేవ‌లం 15,000 (2007 మార్పిడి రేటు నాటికి రూ. 6 లక్షలు) డాల‌ర్లు మాత్ర‌మే. దీనిని పారామౌంట్ పిక్చర్స్ స్వాధీనం చేసుకున్న తర్వాత క్లైమాక్స్ ని మార్చారు. కొన్ని పోస్ట్ ప్రొడక్షన్ పనులు జోడించి అద‌నంగా బ‌డ్జెట్ ని వెచ్చించింది పారామౌంట్. దీని మొత్తం బడ్జెట్ 2,15,000 (రూ. 90 లక్షలు) డాల‌ర్ల‌కు చేరుకుంది. ఈ చిత్రం స్లీపర్ హిట్‌గా నిలిచింది. ప్రపంచవ్యాప్తంగా 193 మిలియన్ల (దాదాపు రూ. 800 కోట్లు) డాల‌ర్ల నెట్ వసూళ్లు నమోదు చేసింది. ఇది చరిత్రలోనే అత్యధిక కలెక్షన్ల‌ను సాధించిన సాధార‌ణ బ‌డ్జెట్ సినిమాగా రికార్డుల‌కెక్కింది. ఆ త‌ర్వాత‌ పారానార్మల్ యాక్టివిటీ కి సీక్వెల్ సినిమాలు వ‌చ్చి అసాధార‌ణ విజ‌యాలు సాధించాయి.

పారానార్మల్ యాక్టివిటీ విజయం ఫ్రాంచైజీకి దారితీసింది. ఇది ఆరు సీక్వెల్‌లు స్పిన్‌ఆఫ్‌లతో సంచ‌ల‌న వ‌సూళ్ల‌ను సాధించింది.. పారానార్మల్ యాక్టివిటీ ఫ్రాంచైజీలోని ఏడు సినిమాలు కేవలం 28 మిలియన్ల డాల‌ర్ల (రూ. 230 కోట్లు) బడ్జెట్‌తో తెర‌కెక్క‌గా.. ప్రపంచవ్యాప్తంగా 890 మిలియన్ డాల‌ర్ల‌(రూ. 7320 కోట్లు) ను వసూలు చేశాయి. మళ్ళీ మరే ఇతర ఫ్రాంచైజీకి ఇంత పెద్ద సక్సెస్ రేటు లేదు. పైగా ఇవి లైవ్ గా ఏం జ‌రుగుతుందో సీసీటీవీలో చిత్రీక‌రించిన ఫుటేజ్ తో తెర‌కెక్కిన సినిమాలుగా ప్రాచుర్యం పొందాయి. ఇదే ఫార్మాట్ ని పలువురు ఇండిపెండెంట్ ఫిలింమేక‌ర్స్ త‌మ హార‌ర్ సినిమాల్లో ఉపయోగించారు. కొన్ని ఉదాహరణలను ప‌రిశీలిస్తే.. ది లాస్ట్ ఎక్సార్సిజం, అపోలో 18, ది డెవిల్ ఇన్‌సైడ్. V/H/S సిరీస్ జాబితాలో ఉన్నాయి.

ప్రపంచంలో టాప్ 10 బెస్ట్ ప‌రిమిత బ‌డ్జెట్ సినిమాలు..

పారానార్మల్ యాక్టివిటీకి ముందు `ది బ్లెయిర్ విచ్` నంబ‌ర్ వ‌న్ స్థానంలో ఉంది. 1999లో విడుద‌లైన ఈ చిత్రం 2,00,000 (రూ. 85 లక్షలు) డాల‌ర్ల‌ బడ్జెట్‌తో నిర్మించ‌గా ప్రపంచవ్యాప్తంగా 243 మిలియన్ల డాల‌ర్లు (రూ. 1045 కోట్లు) వసూలు చేసింది. 2003 చిత్రం `టార్నేషన్` కేవలం 218 (రూ. 10,000) డాల‌ర్ల‌ బడ్జెట్‌తో నిర్మించగా 1.2 మిలియన్ల(రూ. 5.5 కోట్లు) డాల‌ర్లు సంపాదించింది. 1972 అశ్లీల చిత్రం డీప్ థ్రోట్ రూ.25,000 (రూ. 1.9 లక్షలు) బడ్జెట్‌తో తెర‌కెక్కింది. 22 మిలియన్ల డాల‌ర్లు (రూ. 17 కోట్లు) వసూలు చేసింది. ఈ జాబితాలో 1977 హారర్ చిత్రం `ఎరేజర్ హెడ్` చివరి స్థానంలో నిలిచింది. 10,000 డాల‌ర్ల‌ బడ్జెట్ (రూ. 87,000)తో రూపొందించిన ఈ చిత్రం బాక్సాఫీస్ వద్ద 7 మిలియన్ డాల‌ర్లు (రూ. 6 కోట్లు) సంపాదించింది.