ఉరేసుకుని ఆత్మ‌హ‌త్య చేసుకున్న న‌టుడు!

హిందీ న‌టుడు నితిన్ చౌహాన్ (35) మృతి చెందాడు. ముంబైలోని త‌న అపార్ట్ మెంట్ లో ఆత్మ‌హ‌త్య‌కు పాల్ప‌డ్డాడు. నితిన్ చౌహాన్ మృతి చెందిన విష‌యాన్ని ఆయ‌న స్నేహితులు సుదీప్ సాహిర్, విభూతి ఠాకుర్ ధ్రువీక‌రించారు. నితిన్ మ‌ర‌ణంపై స్నేహితులు, తోటి న‌టీన‌టులు దిగ్బ్రాంతిని వ్య‌క్తం చేసారు. నితిన్ స్వ‌స్థ‌లం ఉత్తరప్రదేశ్ అలీగఢ్‌. సినిమాల‌పై ఉన్న ఇష్టంతో ముంబైకి మ‌కాం మార్చాడు.

ప్ర‌స్తుతం న‌టుడిగా నిల‌దొక్కుకునే ప్ర‌య‌త్నాల్లో ఉన్నాడు. `దాదాగిరి 2` అనే రియాలిటీ షోగా విజేత‌గా నిలిచాడు. అటుపై `స్ప్లిట్స్ విల్లా 5`, `జిందకీ డాట్ కామ్`, `క్రైమ్ పాట్రోల్` వంటి రియాలిటీ షోల‌తో మంచి గుర్తింపు తెచ్చు కున్నాడు. `తేరా యార్ హూన్ మైన్లో` నితిన్ చివరిసారిగా స్క్రీన్‌పై కనిపించాడు.

బాలీవుడ్ చిత్రాల్లో న‌టించేందుకు అవ‌కాశాల కోసం ప్ర‌య‌త్నాలు చేస్తున్నాడు. కానీ ఇంత‌వ‌ర‌కూ సినిమాల్లో న‌టించే ఛాన్స్ రాలేదు. 2009 నుంచి టెలివిజ‌న్ రంగంలో కొన‌సాగుతున్నాడు. దాదాగిరి అనే సీజ‌న్ -2తోనే కెరీర్ ప్రారంభించాడు. ఆ త‌ర్వాత ఛానెల్స్ లో వివిధ విభాగాల్లోనూ ప‌నిచేసాడు.

మ‌రో వారం రోజుల్లోనే నితిన్ 36వ పుట్టిన రోజు వేడుక‌లను ఘ‌నంగా నిర్వ‌హించేందుకు ప్లాన్ చేస్తున్నారు. ఇంత‌లోనే ఇలా ఆత్మ‌హ‌త్య‌కు పాల్ప‌డ టంతో కుటుంబ స‌భ్యులు, స్నేహితులు విల‌పిస్తున్నారు. ఈ ఘ‌ట‌న‌కు సంబంధించి పోలీసులు కేసు న‌మోదు చేసి ద‌ర్యాప్తు చేస్తున్నారు. ప్రాధ‌మికంగా ఆత్మ‌హత్య‌గా కేసు న‌మోదు చేసినా? అన్ని కోణాల్లోనూ విచార‌ణ చేస్తున్న‌ట్లు పోలీసులు తెలిపారు.