లైసెన్స్‌డ్ తుపాకీలు ఉన్న టాప్ స్టార్లు

ఇటీవ‌ల బాలీవుడ్ నటుడు గోవింద ప్రమాదవశాత్తూ లైసెన్స్ డ్ తుపాకీతో త‌న కాలిని కాల్చుకున్న ఘ‌ట‌న క‌ల‌క‌లం రేపిన సంగ‌తి తెలిసిందే. ఇది పొర‌పాటున జ‌రిగింద‌ని గోవిందా స‌న్నిహిత వ‌ర్గాలు వెల్ల‌డించాయి. అత‌డు తుపాకీని హ్యాండిల్ చేస్తున్నప్పుడు అది ఊహించని విధంగా డిశ్చార్జ్ అయ్యిందని, ఫలితంగా గాయం అయ్యిందని సోర్సెస్ తెలిపాయి. అదృష్టవశాత్తూ గోవింద కోలుకుంటున్నారని, పూర్తిగా కోలుకోవాల్సి ఉంద‌ని హిందీ మీడియా పేర్కొంది.

అయితే ఈ సంఘటన రక్షణ కోసం ఆయుధాలు కలిగి ఉన్న ఇతర బాలీవుడ్ తారల గురించి తెలుసుకోవాల‌నే ఉత్సుకతను పెంచింది. అధికారికంగా లైసెన్స్ డ్ తుపాకీలు సాధారణంగా పోలీసులు, సెక్యూరిటీ లేదా సైనిక సిబ్బంది వ‌ద్ద ఉంటాయి. అయితే ఆశ్చర్యకరంగా పెద్ద ఎత్తున‌ బాలీవుడ్ ప్రముఖులు చట్టబద్ధంగా తుపాకులను కలిగి ఉన్నారు. భారతదేశంలో తుపాకులు, ఆయుధాల‌కు యాజమాన్యం ఎక్కువగా నియంత్ర‌ణ‌లో ఉంటుంది. అయితే కొంతమంది స్టార్లు వ్యక్తిగత భద్రత కోసం తుపాకీలను కొనుగోలు చేశారు. వారి వివ‌రాల్లోకి వెళితే...

స‌ల్మాన్-అమితాబ్- డియోల్‌ల‌కు తుపాకులు:

2022లో అనామక గ్యాంగ్ స్ట‌ర్‌ల నుంచి హ‌త్యా బెదిరింపులు వచ్చిన ఒక నెల తర్వాత బాలీవుడ్ అగ్ర హీరో సల్మాన్ ఖాన్‌కు తుపాకీ లైసెన్స్ మంజూరు అయింది. సల్మాన్ లైసెన్స్ కోసం దరఖాస్తు చేయడంతో ముంబై పోలీసులు లైసెన్స్ జారీ చేశారు. లారెన్స్ బిష్ణోయ్ గ్యాంగ్ సభ్యుల నుండి తనకు వచ్చిన బెదిరింపులను బట్టి ఆత్మ రక్షణ కోసం తనకు తుపాకీ అవసరమని స‌ల్మాన్ తన దరఖాస్తులో వివరించాడు. 26/11 ముంబై దాడుల తర్వాత మెగాస్టార్ అమితాబ్ బచ్చన్ స్వయంగా రివాల్వర్‌ను తీసుకున్నాడు. అతడు పడుకునే ముందు .. తనను త‌న కుటుంబాన్ని రక్షించుకోవాల్సిన అవసరం ఉంది గ‌నుక‌ దాని కోసం తుపాకీ కావాల‌ని అన్నారు. తన లైసెన్స్ పొందిన 0.32 రివాల్వర్‌ను తీసి దానిని లోడ్ చేసి తన దిండు కింద ఉంచానని తన బ్లాగ్‌లో రాసుకొచ్చారు. నటుడు సన్నీ డియోల్ తన ఎన్నికల అఫిడవిట్‌లో లైసెన్స్ పొందిన రివాల్వర్‌ని కలిగి ఉన్నాడు. సింగ్ సాబ్ ది గ్రేట్ చిత్రీకరణ సమయంలో అతడు తన సొంత పిస్టల్‌ను ఉపయోగించాడని కూడా క‌థ‌నాలొచ్చాయి.

నటి పూనమ్ ధిల్లాన్ వద్ద తుపాకీ ఉంది. ఆమె భద్రత కోసం ఇంట్లో ఉంచుతుంది. పాత ఇంటర్వ్యూలో సీనియ‌ర్ న‌టి తుపాకీని కలిగి ఉన్నప్పటికీ దానిని తనతో తీసుకెళ్లడం లేదని పేర్కొంది. రాజకీయ నాయకుడిగా మారిన నటుడు రవి కిషన్ రైఫిల్ , రివాల్వర్ ల‌తో పాటు లైసెన్స్ పొందిన తుపాకీని సొంతం చేసుకున్నారు.

2005లో నటి సోహా అలీ ఖాన్ 0.22-బోర్ రైఫిల్‌ను 3 సంవత్సరాల పునరుద్ధరణ వ్యవధితో సొంతం చేసుకుంది. అయితే వన్యప్రాణి కార్యకర్త నరేష్ కడియాన్ ఫిర్యాదు చేయడంతో ఆమె వయస్సు తక్కువగా ఉందని లైసెన్స్ రద్దు అయింది. నటుడు సంజయ్ దత్ ఒకప్పుడు తన వద్ద దొరికిన తుపాకీ కార‌ణంగా పెద్ద‌ వివాదంలో చిక్కుకున్నాడు. డిసెంబరు 1992లో బాబ్రీ మసీదు కూల్చివేత తర్వాత ముంబై అల్లర్ల సమయంలో తన కుటుంబానికి బెదిరింపులు ఎదురైన త‌ర్వాత‌ తన కుటుంబాన్ని రక్షించడానికి దానిని ఉంచానని వివరించి, AK-56 రైఫిల్, మందుగుండు సామగ్రిని కలిగి ఉన్నట్లు అంగీకరించాడు.