అఖిల్ నెక్స్ట్.. ఇంకా ఎన్ని రోజులు?

అక్కినేని యువ హీరో అఖిల్ కెరియర్ ఆరంభం నుంచి ఫెయిల్యూర్స్ వెంటాడుతున్నాయి. భారీ బడ్జెట్ తో తనని తాను గ్రాండియర్ గా ఆవిష్కరించుకోవడానికి చేసిన అఖిల్ డిజాస్టర్ అయ్యింది. ఆ తరువాత కొంత తగ్గి తనకి సరిపోయే కథలు చేస్తూ వచ్చాడు. అయితే ఈ ఏడాది ఏజెంట్ రూపంలో మరోసారి కోలుకోలేని దెబ్బ తగిలింది. ఈ సినిమా కోసం అఖిల్ చాలా ఎఫర్ట్స్ పెట్టాడు.

ఒళ్ళు హూనం చేసుకున్నారు. నిర్మాత కూడా బడ్జెట్ విషయంలో కాంప్రమైజ్ కాకుండా ఖర్చు పెట్టారు. ఫైనల్ గా థియేటర్స్ లోకి వచ్చిన ఈ చిత్రం 10 శాతం రికవరీ కూడా చేయలేదు. నిర్మాత అనిల్ సుంకరకి కెరియర్ లోనే బిగ్గెస్ట్ డిజాస్టర్ ఏజెంట్ తో తగిలింది. అఖిల్ కి కూడా ఇంచు మించు ఇదే పరిస్థితి. ఈ నేపథ్యంలో నెక్స్ట్ సినిమా విషయంలో అఖిల్ డైలమాలో ఉన్నట్లు తెలుస్తోంది.

యూవీ క్రియేషన్స్ లో కొత్త దర్శకుడితో ఒక పీరియాడికల్ యాక్షన్ మూవీకి గతంలో గ్రీన్ సిగ్నల్ ఇచ్చారు. నిర్మాతలు కూడా బడ్జెట్ ఎక్కువ పెట్టడానికి సిద్ధంగానే ఉన్నారు. అయితే ఏజెంట్ తర్వాత మరుసారి తన మార్కెట్ కి మించిన బడ్జెట్ తో మూవీ అంటే ఎలా ఉంటుందో అనే భయం అఖిల్ ని వెంటాడుతుంది. అందుకే ఈ ప్రాజెక్ట్ విషయంలో ఇంకా సైలెంట్ గానే ఉన్నారు.

అయితే ఇప్పుడు తెరపైకి శ్రీకాంత్ అడ్డాల వచ్చారు. రీసెంట్ గా అతను చెప్పిన స్టోరీ లైన్ అఖిల్ కి బాగా నచ్చిందంట. దీంతో ఈ సినిమాని సెట్స్ పైకి తీసుకొని వెళ్లాలని అనుకుంటున్నారు. మినిమమ్ బడ్జెట్ లో చేయగలిగే మూవీ కాబట్టి ముందుగా శ్రీకాంత్ అడ్డాల సినిమా కంప్లీట్ చేసి తరువాత యూవీ క్రియేషన్స్ లో ప్రాజెక్ట్ ని సెట్స్ పైకి తీసుకొని వెళ్లాలని అనుకుంటున్నాడంట.

అయితే దీనిపైనా కూడా ఇంకా పూర్తిస్థాయిలో క్లారిటీ లేదు. ఏజెంట్ డిజాస్టర్ ఎఫెక్ట్ నుంచి అఖిల్ పూర్తిగా ఇంకా బయటకి రాలేకపోతున్నాడని, అందుకే సినిమాల ఎంపికలో ఆచితూచి వ్యవహరిస్తున్నాడనే మాట టాలీవుడ్ సర్కిల్ లో వినిపిస్తోంది.