పుష్ప 2 ఐటెమ్ సాంగ్.. లీక్ తో మరో క్లారిటీ వచ్చేసింది

ఐకాన్ స్టార్ అల్లు అర్జున్ ప్రధాన పాత్రలో సుకుమార్ తెరకెక్కిస్తున్న పాన్ ఇండియా చిత్రం “పుష్ప 2” పై భారీ అంచనాలు నెలకొన్న విషయం తెలిసిందే. ప్రేక్షకులు ఎంతగానో ఎదురు చూస్తున్న ఈ సినిమాలో తాజా అప్‌డేట్ ఏంటంటే, ఐటెం సాంగ్‌లో అల్లు అర్జున్‌కు జోడీగా శ్రీలీల కనిపించనుంది. ఈ విషయం సంబంధించిన క్లారిటీతో పాటు, కొన్ని లీక్ అయిన ఫోటోలు సోషల్ మీడియాలో వైరల్ అవుతున్నాయి.

పుష్ప 2లో ప్రత్యేక ఐటెం సాంగ్ చాలా కీలకమైందని, గతంలో సమంత లేదా శ్రద్ధా కపూర్‌ను తీసుకుంటారనే ప్రచారం జరిగింది. కానీ, శ్రద్ధా కపూర్ డిమాండ్ చేసిన భారీ రెమ్యూనిరేషన్ కారణంగా యూనిట్ సభ్యులు టాలీవుడ్ వైపు దృష్టి మళ్లించారు. ఇదే క్రమంలో చివరికి శ్రీలీలతో ఈ పాటను చిత్రీకరించాలనే నిర్ణయం తీసుకున్నారు.

హైదరాబాద్‌లో ప్రత్యేకంగా వేసిన సెట్‌లో ఈ పాటను చిత్రీకరిస్తున్నారు. అల్లు అర్జున్ పుష్పరాజ్ స్టైల్‌లో కనిపిస్తున్న ఫోటోతో పాటు, శ్రీలీల గ్లామర్ లుక్‌లో అతని పక్కన దర్శనమిచ్చిన ఫోటో సోషల్ మీడియాలో హల్‌చల్ చేస్తోంది. ఈ ఫోటో వైరల్ కావడంతో పాటు, అభిమానుల్లో భారీ ఉత్సాహాన్ని రేకెత్తిస్తోంది. అలాగే వారి గెటప్స్ కూడా ఊర మాస్ అనేలా ఉన్నాయి. కాంబినేషన్ అదిరిందనే కామెంట్స్ వస్తున్నాయి.

ఈ పాట లిరిక్స్ “కిస్సిక్” అంటూ ఉంటుందని మేకర్స్ ప్రకటించారు. పాటను “సాంగ్ ఆఫ్ ది ఇయర్”గా రూపొందించామని యూనిట్ సభ్యులు తెలియజేశారు. గతంలో దేవిశ్రీ ప్రసాద్ ఇచ్చిన సెన్సేషనల్ చార్ట్‌బస్టర్ సాంగ్ తరహాలోనే ఈసారి కూడా అలాంటి హిట్ సాంగ్ ఉంటుందని అభిమానులు భావిస్తున్నారు. మైత్రి మూవీ మేకర్స్ నిర్మాణంలో రూపొందుతున్న ఈ భారీ బడ్జెట్ చిత్రం, డిసెంబర్ 5న ప్రపంచవ్యాప్తంగా విడుదల కానుంది.

సినిమాలో ఐటెమ్ సాంగ్ ద్వారా అల్లు అర్జున్, శ్రీలీల కలయిక భారీ ఎంటర్‌టైన్‌మెంట్‌ను అందిస్తుందని మేకర్స్ క్లారిటీ ఇచ్చారు. ఇక సినిమా షూటింగ్ ప్రస్తుతం చివరి దశలో ఉంది. నవంబర్ 20 లోపు పోస్ట్ ప్రొడక్షన్ పనులు కూడా పూర్తయ్యే విధంగా మేకర్స్ హార్డ్ వర్క్ చేస్తున్నారు. దాదాపు 350 కోట్ల భారీ బడ్జెట్ తో రూపొందుతున్న పుష్ప 2 తప్పకుండా బాక్సాఫీస్ వద్ద 1000 కోట్లను అందుకుంటుందని ఫ్యాన్స్ నమ్ముతున్నారు. మరి సినిమా ఆ రేంజ్ లో క్లిక్కవుతుందో లేదో చూడాలి.