చిన్న సినిమా.. పెద్ద ప్లాన్!

సాయి రాజేష్ కల్ట్ మూవీ బేబీ, నాని సూపర్ హిట్ హాయ్ నాన్న, పాయల్ క్రేజీ సినిమా మంగళవారం, తరుణ్ భాస్కర్ కీడా కోలా, శ్రీ విష్ణు సామజవరగమన, ధనుష్ సార్.. ఈ సూపర్ హిట్ సినిమాలన్నింటిలో ఉన్న కామన్ పాయింట్ ఏంటో తెలుసా? పక్కా ప్లాన్ తో రిలీజ్ ముందు రోజు ప్రీమియర్స్ వేయడమే.

అసలు అంచనాలు లేకుండా రిలీజైన ఈ సినిమాలు.. ప్రీమియర్స్ నుంచే పాజిటివ్ టాక్ తెచ్చుకోవడంతో సూపర్ హిట్ అయ్యాయి. బాక్సాఫీస్ దగ్గర ఊహించిన దానికన్నా ఎక్కువ కలెక్షన్స్ రాబట్టాయి. అందుకు ప్రీమియర్సే ప్రధాన కారణమని చెప్పవచ్చు. ఇటీవల రిలీజై రూ.250 కోట్లకుపైగా కలెక్ట్ చేసిన హనుమాన్ కూడా ప్రీమియర్స్ నుంచి పాజిటివ్ టాక్ తెచ్చుకుని బాక్సాఫీస్ ను షేక్ చేసింది.

ఇప్పుడు ఇదే ట్రెండ్ ఫాలో అవుతోంది సుహాస్ కొత్త మూవీ అంబాజీపేట మ్యారేజ్ బ్యాండ్. కామెడీ, లవ్, ఎమోషనల్ ఎంటర్టైనర్ గా రూపొందించిన ఈ సినిమా ఫిబ్రవరి 2వ తేదీన థియేటర్స్ లోకి రానుంది. కొత్త దర్శకుడు దుష్యంత్ కటికినేని తెరకెక్కించిన ఈ మూవీ ట్రైలర్.. సినిమాపై మంచి బజ్ క్రియేట్ చేసింది. ఇక రిలీజ్ కు ముందు రోజు అంటే ఫిబ్రవరి 1వ తేదీన ఈ సినిమా పెయిడ్ ప్రీమియర్స్ వేయడానికి మేకర్స్ సిద్ధమయ్యారు.

రెండు తెలుగు రాష్ట్రాల్లో ఫిబ్రవరి 1వ తేదీన పెయిడ్ ప్రీమియర్స్ కు రంగం సిద్ధం చేశారు మేకర్స్. ఈ వీకెండ్ కాస్త చిన్న సినిమాల రిలీజ్ లు ఎక్కువే ఉండడంతో సినీ ప్రియుల దృష్టి తమ వైపు తిప్పుకునేందుకు ప్రీమియర్ షోస్ తో స్కెచ్ వేశారు. అయితే పెయిడ్ ప్రీమియర్స్ పై మేకర్స్ ఫుల్ కాన్ఫిడెంట్ గా ఉన్నారు. తమ సినిమా కచ్చితంగా సూపర్ హిట్ అవుద్దని చెబుతున్నారు.

ఈ సినిమాలో సుహాస్ తో పాటు శివానీ నాగరం, సీనియర్ నటుడు గోపరాజు రమణ, పుష్ప ఫేమ్ జగదీశ్ బండారి తదితరులు కీలక పాత్రలు పోషించారు. గీతా ఆర్ట్స్ 2 పిక్చర్స్, దర్శకుడు వెంకటేశ్ మహాకు చెందిన మహా క్రియేషన్స్ సంయుక్తంగా ఈ చిత్రాన్ని నిర్మించాయి. శేఖర్ చంద్ర సంగీతం అందించిన ఈ సినిమాకు వాజిద్ బేగ్ సినిమాటోగ్రాఫర్ గా వ్యవహరించారు. మరి అంబాజీపేట మ్యారేజ్ బ్యాండ్ సినిమా విషయంలో ప్రీమియర్స్ ఎలాంటి రిజల్ట్ ఇస్తుందో వేచి చూడాలి.