కార్తికేయ రీమేక్.. హీరో ఎవరో తెలుసా?

2014లో సెన్సేషనల్ హిట్టయిన సినిమాల్లో కార్తికేయ పేరు ముందు చెప్పుకోవాలి. నిఖిల్ హీరో.. కొత్త దర్శకుడు.. కొత్త నిర్మాత.. లో బడ్జెట్ అనగానే ఈ సినిమా గురించి తక్కువగా అంచనా వేశారు. కానీ ఈ సినిమా పెద్ద సినిమాల స్థాయిలో అనూహ్యమైన వసూళ్లు సాధించి ఔరా అనిపించింది. రూ.20 కోట్లకు పైగా వసూళ్లు సాధించి చిన్న సినిమాల్లో పెద్ద సినిమాగా అవతరించింది. దర్శకుడిగా చందూ మొండేటి అద్భుత ప్రతిభకు తార్కాణంగా నిలిచిన ఈ సినిమా ఇప్పుడు కన్నడలోకి రీమేక్ అవుతోంది. అందులో హీరో ఎవరో తెలిస్తే ఆశ్చర్యపోవాల్సిందే. ఆ హీరో మరెవరో కాదు.. సాయికుమార్ తనయుడు ఆది.

తెలుగులో ఆల్రెడీ హీరోగా ఎస్టాబ్లిష్ అయ్యే ప్రయత్నంలో ఉన్నవాడు.. ఓ తెలుగు సినిమా కన్నడ రీమేక్ లో నటించడం ఆశ్చర్యం కలిగించే విషయమే. ఐతే సాయికుమార్ కు కన్నడ నాట ఉన్న ఫాలోయింగ్ గురించి కొత్తగా చెప్పాల్సిన పని లేదు. తెలుగులో కంటే ఆయన అక్కడ పెద్ద హీరో. ఇలాగే తన కొడుకుని కూడా కన్నడలో హీరోగా నిలబెట్టే ప్రయత్నంలో సాయికుమార్.. అతడిని అక్కడ ఇంట్రడ్యూస్ చేయబోతున్నాడు. ఈ క్రమంలో సాయికుమార్ ఓ ప్రత్యేకమైన సినిమానే ఎంచుకన్నాడు. మరి కన్నడలో ఈ చిత్రాన్ని ఎవరు డైరెక్ట్ చేస్తారో.. ఎవరు నిర్మిస్తారో చూడాలి. ఏ భాషలో అయినా హిట్టయ్యే యూనివర్శల్ కంటెంట్ ఉన్న సినిమా ‘కార్తికేయ’. మరి సాయికుమార్ తనయుడికి ఈ రీమేక్ కన్నడలో ఎలాంటి ఆరంభాన్నిస్తుందో చూడాలి.