టీజ‌ర్‌ టాక్: అవును.. ఆవిరి ప‌ట్టే దెయ్య‌మిది

అల్ల‌రి ర‌విబాబు తెర‌కెక్కించిన `అవును` సిరీస్ గురించి తెలిసిందే. హార‌ర్ నేప‌థ్యంలో వ‌చ్చిన ఈ ఫ్రాంఛైజీ లో  మొద‌టిది మాత్ర‌మే బ్లాక్ బ‌స్ట‌ర్ అయ్యింది. ఆ త‌ర్వాత అన్నీ చేదు అనుభ‌వాలే మిగిలాయి. దోస్త్ సురేష్ బాబుతో క‌లిసి ర‌విబాబు చేసిన గ‌త‌ ప్ర‌య‌త్నాలు స‌ఫ‌లం కాక‌పోవ‌డంతో ఇప్పుడు రూటు మార్చి దిల్ రాజు కాంపౌండ్ లోకి అడుగు పెట్టాడు. దిల్ రాజుతో క‌లిసి ర‌విబాబు మ‌రో హార‌ర్ చిత్రాన్ని తెర‌కెక్కిస్తున్నారు. దీనికి దిల్ రాజు- ర‌విబాబు నిర్మాత‌లు.

అయితే కాంపౌండ్ మారినంత మాత్రాన హిట్టొస్తుందా? అస‌లు ఈ కాంబినేష‌న్ మూవీ `ఆవిరి` క‌థేంటి? అన్న‌ది చూస్తే... ఇది కూడా మ‌రో హార‌ర్ సినిమా. ఈసారి చెమ‌ట‌లు ప‌ట్టించే దెయ్యాన్ని కాదు... ఆవిరి ప‌ట్టించే దెయ్యాన్ని చూపిస్తున్నాడ‌న్న‌మాట‌. ఆవిరి టైటిల్ కి త‌గ్గ‌ట్టు తాజా టీజ‌ర్ లో మంచంలోంచే ఆవిరి వ‌చ్చేస్తోంది. అందులోంచి ఓ చెయ్యి కూడా బ‌య‌ట‌కు వ‌చ్చింది. అలాగే చైర్ దానంత‌ట అదే క‌దిలిపోవ‌డం.. జూస్ జ‌గ్ గాల్లోకి లేచి గ్లాసులో ఒంపుకోవ‌డం.. షూస్ వాటంత‌ట అవే న‌డుచుకుంటూ వెళ్లిపోవ‌డం.. బ‌ల్ల‌ల్లోంచి మేకులు క‌ద‌ల‌డం.. ఇవ‌న్నీ ష‌రా మామూలుగానే ఉన్నాయి. అయితే ఈ టీజ‌ర్ లో కొత్తేంటి? అంటే చెప్పుకోవ‌డానికేం లేదు. య‌థావిధిగానే ఒక ఇంట్లో దెయ్యం క‌థ‌తో తెర‌కెక్కింది.

అయితే నేరేష‌న్ ప‌రంగా క‌ళ్లు తిప్పుకోనివ్వ‌నంత‌గా ఏం చూపిస్తాడు? అన్న‌ది మాత్రం ఆగి చూడాలి. పూర్తి సినిమా చూడాలంటే అక్టోబ‌ర్ 18న థియేట‌ర్ల‌లోకి వ‌స్తోంది కాబ‌ట్టి అప్ప‌టివ‌ర‌కూ ఆగాలి. దెయ్యాన్ని క‌నిపెట్ట‌గ‌ల‌రా.. ఎక్క‌డుందో! అంటూ ర‌విబాబు వేసిన ఫ‌జిల్ బాగానే ఉంది. ఇంట్లో దెయ్యాల క‌ద‌లికల్ని ఆస‌క్తిక‌రంగానే చూపించాడు. కానీ ఈ చిత్రంలో కొత్తేంటి? అన్న‌దే ఇప్ప‌టికి స‌స్పెన్స్. కొన్ని వ‌రుస ఫ్లాపుల త‌ర్వాత ఈసారి హిట్టు కొడ‌తాడా? అన్న‌ది చూడాలి. ర‌విబాబు స్వ‌యంగా క‌థ‌-క‌థ‌నం రాసుకున్నారు. నేహా చౌహాన్-శ్రీ ముక్త‌- భ‌వానీ శంక‌ర్-ముక్తార్ ఖాన్ త‌దిత‌రులు ఈ చిత్రంలో న‌టిస్తున్నారు. సైలెంటుగా త‌న ప‌నేదో తాను చేసుకుపోయే ర‌విబాబుకి దిల్ రాజు స్నేహ‌హ‌స్తం ఇచ్చారు. ఏం జ‌ర‌గబోతోందో మ‌రి.


Full View