'మహేష్ గారు స్క్రిప్ట్ కూడా వినలేదు'

టాలీవుడ్ టాలెంటెడ్ హీరో అడవి శేష్ కెరీర్ బిగినింగ్ నుంచి కూడా విభిన్నమైన కథలను ఎంపిక చేసుకుంటూ తనకంటూ ప్రత్యేకమైన గుర్తింపు తెచ్చుకున్నాడు. నటుడిగానే కాకుండా స్క్రిప్ట్ రైటర్ గా దర్శకుడిగా కూడా రాణించిన శేష్ మల్టీ టాలెంటెడ్ అనిపించుకున్నాడు. 'క్షణం' 'గూఢచారి' 'ఎవ‌రు' సినిమాలతో వరుస హిట్లు సొంతం చేసుకున్నాడు. ఇప్పుడు ''మేజర్'' సినిమాతో ప్రేక్షకుల ముందుకు రాబోతున్నాడు శేష్. 26/11 ముంబై దాడుల్లో దేశం కోసం ప్రాణాలను అర్పించిన మేజర్ సందీప్ ఉన్నికృష్ణన్‌ జీవితం ఆధారంగా ఈ సినిమా రూపొందిస్తున్నారు. సూపర్ స్టార్ మహేష్ బాబు జీఎంబీ ఎంటర్టైన్మెంట్ మరియు ఏ ప్లస్ ఎస్ మూవీస్ సహకారంతో సోనీ పిక్చర్స్ ఫిల్మ్స్ ఇండియా ఈ చిత్రాన్ని నిర్మిస్తోంది. ఇటీవల విడుదలైన 'మేజర్' ఫస్ట్ లుక్ విశేష స్పందన తెచ్చుకుంది. ఈ సందర్భంగా అడవి శేష్ ఓ ఇంటర్వ్యూలో మాట్లాడుతూ సినిమా విశేషాలు వెల్లడించారు.

శేష్ మాట్లాడుతూ ''మహేష్ బాబు మరియు నమ్రతా నాపై చాలా నమ్మకం పెట్టుకున్నారు. కాబట్టి బెస్ట్ సినిమా ఇవ్వడానికి నాపై చాలా ప్రెజర్ ఉంది. నేను 'మేజర్' స్క్రిప్ట్‌ ను నమ్రతా గారికి మాత్రమే వివరించాను. మహేష్ గారు స్క్రిప్ట్ కూడా వినలేదు. సినిమా కోసం మాకు అవసరమైన ప్రతి దాన్ని అందిస్తున్నారు. మేము గొప్ప సినిమా చేస్తున్నామని నమ్రతా గారు చెప్పారు. ‘మేజర్’ సినిమా చాలా బాగా వస్తోంది. ప్రేక్షకులను తప్పకుండా మెప్పిస్తుంది. నిస్వార్థప‌రుడు, ధైర్యవంతుడు మ‌నంద‌రికీ ఎంతో ఇష్ట‌మైన‌ మేజర్ సందీప్ ఉన్నికృష్ణన్‌ గా న‌టించ‌డం ఎంతో గ‌ర్వంగా ఉంది'' అని తెలిపారు. తెలుగు, హిందీ భాషలలో రూపొందుతోన్న‌ ఈ మూవీకి శశి కిరణ్ తిక్కా దర్శకత్వం వహిస్తున్నారు. ఇందులో తెలుగమ్మాయి శోభితా దూళిపాళ్ల - బాలీవుడ్ బ్యూటీ సైఈ మంజ్రేకర్ - ప్రకాష్ రాజ్ - రేవతి - మురళి శర్మ త‌దిత‌రులు ముఖ్య పాత్రల్లో నటిస్తున్నారు. 2021 స‌మ్మ‌ర్ లో 'మేజర్' చిత్రాన్ని విడుదల చేయ‌నున్నారు.