సౌత్ ఇండియా షేకైపోతోంది

రజినీకాంత్ సినిమా వచ్చిందంటే సౌత్ ఇండియాలో ఎలాంటి సందడి నెలకొంటుందో తెలిసిందే. ఇప్పుడు అజిత్ సినిమా ‘వివేగం’ విషయంలోనూ ఇలాంటి హంగామానే కనిపిస్తోంది. ‘వివేగం’ టీం ప్రత్యేకంగా ఆడియో వేడుక.. ప్రి రిలీజ్ ఈవెంట్ లాంటివేమీ చేసింది లేదు. ఇంకే ప్రమోషనల్ ఈవెంట్లు కూడా ఏర్పాటు చేయలేదు. హీరో అజిత్ అసలీ సినిమా గురించి ఒక్క ముక్క మాట్లాడింది లేదు. అయినప్పటికీ ‘వివేగం’ సూపర్ క్రేజ్ సంపాదించుకుంది. రజినీకాంత్ సినిమాల స్థాయిలో దీనికి హైప్ కనిపిస్తోంది. ఈ గురువారం సౌత్ ఇండియా అంతటా ఈ చిత్రం భారీ స్థాయిలో విడుదలకు సిద్ధమవుతోంది.

తమిళనాడులో ఈ సినిమా దాదాపు వెయ్యి థియేటర్లలో రిలీజవుతోంది. తెలుగు రాష్ట్రాల్లో ఈ నంబర్ మామూలే కావచ్చు. కానీ తమిళనాట మాత్రం ఇది చాలా పెద్ద సంఖ్య. అక్కడ థియేటర్లు తక్కువ. ఒక్క చెన్నైలో మాత్రమే వందకు పైగా స్క్రీన్లలో ఈ చిత్రం రిలీజవుతోంది. తొలి రోజు ‘కబాలి’.. ‘బాహుబలి-2’ లాంటి సినిమాల కంటే మిన్నగా ఏకంగా 300 షోలు వేస్తుండటం విశేషం. మాయాజల్ అనే మల్టీప్లెక్స్ థియేటర్లో మాత్రమే తొలి రోజు 65 షోలు పడుతున్నాయంటే పరిస్థితి అర్థం చేసుకోవచ్చు. తమిళనాడు పొరుగు రాష్ట్రమైన కేరళలో పరాయి భాషా చిత్రాలు వేటికీ లేనంత స్థాయిలో ఈ సినిమాను 300 స్క్రీన్లలో రిలీజ్ చేస్తుండటం విశేషం. మోహన్ లాల్ లాంటి స్టార్ల సినిమాలు మాత్రమే కేరళలో ఈ స్థాయిలో రిలీజవుతాయి. తొలి రోజు కేరళ వ్యాప్తంగా వెయ్యికి పైగా షోలు పడుతుండటం కూడా రికార్డే. మరోవైపు కర్ణాటకలోనూ ‘వివేగం’ను పెద్ద ఎత్తున రిలీజ్ చేస్తున్నారు. ఇక తెలుగు రాష్ట్రాల్లో ‘వివేగం’ తెలుగు వెర్షన్ ‘వివేకం’ విడుదలవుతున్న సంగతి తెలిసిందే. ఇలా మొత్తం సౌత్ ఇండియా అంతటా ఈ గురువారం ‘వివేగం’ మోత మోగించబోతోంది.