ప్రెస్‌ మీట్‌ లో స్టార్‌ హీరో చేసిన పని వైరల్‌

సెలబ్రెటీల్లో ఎక్కువ శాతం మంది ప్రెస్‌ మీట్‌ సమయంలో ఏదైనా డిస్ట్రబెన్స్‌ అయితే చిరాకు పడటం మనం చాలా కామన్‌ గా చూస్తేనే ఉంటాం. సీరియస్‌ గా మాట్లాడుతున్న సమయంలో ఏదైనా అవాంతరం వస్తే ఎవరికైనా కోపం వస్తుంది. కాని తాజాగా బాలీవుడ్‌ స్టార్‌ హీరో అక్షయ్‌ కుమార్‌ చేసిన పని మాత్రం అందరి దృష్టిని ఆకర్షిస్తోంది. తాజాగా ప్రెస్‌ మీట్‌ సందర్బంగా ఒక జర్నలిస్ట్‌ కు ఫోన్‌ రావడంతో ఆ ఫోన్‌ ఎత్తి ప్రెస్‌ మీట్‌ లో ఉన్నా అంటూ సమాధానం చెప్పిన వీడియో ప్రస్తుతం సోషల్‌ మీడియాలో వైరల్‌ అవుతుంది.

అక్షయ్‌ కుమార్‌ హీరోగా తెరకెక్కిన 'మిషన్‌ మంగళ్‌' రేపు ప్రేక్షకుల ముందుకు రాబోతున్న విషయం తెల్సిందే. ఈ చిత్రంపై హిందీ ప్రేక్షకుల్లో అంచనాలు ఆకాశాన్ని తాకేలా ఉన్నాయి. ఇక ఈ చిత్రం ప్రమోషన్స్‌ లో భాగంగా తాజాగా హీరోయిన్స్‌ తో కలిసి అక్షయ్‌ కుమార్‌ మీడియా సమావేశం ఏర్పాటు చేయడం జరిగింది. ఆ సమావేశంలో ఒక జర్నలిస్ట్‌ వాయిస్‌ రికార్డ్‌ చేసేందుకు తన ఫోన్‌ ను రికార్డింగ్‌ మోడ్‌ లో పెట్టి వారి ముందు పెట్టాడు. అయితే ఆ ఫోన్‌ ను సైలెంట్‌ లో పెట్టడం సదరు జర్నలిస్ట్‌ మర్చి పోయాడు.

హీరోయిన్‌ కీర్తి కుల్హరి సినిమా గురించి సీరియస్‌ గా మాట్లాడుతున్న సమయంలో ఆ మొబైల్‌ రింగ్‌ అయ్యింది. వెంటనే ఆ ఫోన్‌ ను అందుకున్న అక్షయ్‌ కుమార్‌ లిఫ్ట్‌ చేసి.. హలో మేము ప్రెస్‌ మీట్‌ లో ఉన్నాం. నేను అక్షయ్‌ కుమార్‌ ను మాట్లాడుతున్నాను.. ప్రెస్‌ మీట్‌ పూర్తి అయ్యాక ఫోన్‌ చేస్తానంటూ సమాధానం చెప్పి కట్‌ చేసి మళ్లీ ఫోన్‌ అక్కడ పెట్టేశాడు. అక్షయ్‌ చేసిన పనికి ఆయన పక్కన ఉన్న హీరోయిన్స్‌ మరియు జర్నలిస్ట్‌ లు అంతా కూడా అవాక్కయ్యారు.