అల్లు అర్జున్ తర్వాత అతడితోనేనా?

మిగతా హీరోలతో పోలిస్తే అల్లు అర్జున్ కొంచెం స్లోనే. ఒక సినిమా చేస్తుండగా.. ఇంకో సినిమా పని అస్సలు మొదలుపెట్టడు. ఒక ప్రాజెక్టు కథ తేల్చాకే తర్వాతి దాంట్లోకి వెళ్తాడు. ముందుగా అన్నీ సిద్ధం చేసుకుని.. ఒక సినిమా అయిన వెంటనే ఇంకోటి మొదలుపెట్టేసే అలవాటు కూడా బన్నీకి లేదు. ఒక సినిమా పూర్తిచేయడం.. ఆ తర్వాత కొన్ని కథలు ముందు వేసుకోవడం.. దర్శకులతో చర్చలు జరపడం.. స్క్రిప్టు డిస్కషన్లలో కూడా పాల్గొని.. తనకు ఏది పక్కాగా సూటవుతుందో అది ఎంచుకుని సినిమా చేయడం.. ఆ సినిమా చేస్తున్నంత కాలం దాని మీదే పూర్తిగా ఫోకస్ పెట్టడం.. ఇదీ కొన్నేళ్లుగా సాగుతున్న బన్నీ వ్యవహారం. ఇదే తన సక్సెస్ సీక్రెట్ అని కూడా బన్నీ బలంగా నమ్ముతున్నాడు.

గత ఏడాది మధ్య నుంచి ‘నా పేరు సూర్య’ సినిమాలో మునిగిపోయి ఉన్న బన్నీ.. తర్వాత ఫలానా దర్శకుడితో సినిమా చేస్తాడంటూ రకరకాల ఊహాగానాలు వినిపించాయి. ఐతే అవన్నీ అబద్ధమే అని తేలిపోయింది. ఇప్పటిదాకా ఏ సినిమా కూడా కన్ఫమ్ కాలేదు. ఐతే మరికొన్ని రోజుల్లోనే ఈ చిత్రాన్ని పూర్తి చేయబోతున్న అల్లు అర్జున్.. తర్వాత చేయబోయే సినిమాకు సూచన ప్రాయంగా ఓకే చెప్పినట్లు సమాచారం. విలక్షణ దర్శకుడు క్రిష్‌ అతను హీరోగా సినిమా రూపొందిస్తాడట. ఈ ఏడాది ద్వితీయార్ధంలో వీళ్లిద్దరూ సినిమా మొదలుపెట్టే అవకాశాలున్నాయి.