అనిరుధ్.. టాలీవుడ్ ను వదలేయట్లేదు

ఇప్పటికి రెండుసార్లు టాలీవుడ్ లో అడుగుపెట్టినట్లే పెట్టి వెనక్కి వెళ్లిపోయాడు కోలీవుడ్ సెన్సేషనల్ మ్యూజిక్ డైరెక్టర్ అనిరుధ్ రవిచందర్. ముందు రామ్ చరణ్ ‘బ్రూస్ లీ’ మూవీకి అతణ్ని సంగీత దర్శకుడిగా ఎంచుకున్నారు. కానీ ఆ సినిమా మొదలవకముందే తప్పుకున్నాడు అనిరుధ్. ఆ తర్వాత త్రివిక్రమ్-నితిన్ కాంబినేషన్ లో ‘అ..ఆ’ సినిమాకు అనిరుధ్ ను తీసుకున్నారు. కానీ ఆ సినిమా పూర్తయ్యే సమయానికి సడెన్ గా ఆ ప్రాజెక్టు నుంచి కూడా తప్పుకున్నాడు అనిరుధ్. అతనే సైడైపోతున్నాడా.. లేక వీళ్లే తప్పిస్తున్నారా అన్నది తెలియదు కానీ.. మొత్తానికి ఓ టాలెంటెడ్ మ్యూజిక్ డైరెక్టర్ తెలుగులోకి వచ్చినట్లే వచ్చి వెనక్కెళ్లిపోతున్నాడు.

ఐతే ఈ ఏడాది మాత్రం అనిరుధ్ ఖాయంగా టాలీవుడ్ లో అడుగుపెట్టబోతున్నాడట. అది కూడా పవర్ స్టార్ పవన్ కళ్యాణ్ సినిమాతో అతను తెలుగులో అరంగేట్రం చేయబోతున్నాడట. తనతో ఖుషి - పులి సినిమాలు చేసిన ఎస్.జె.సూర్య దర్శకత్వంలో పవన్ ఓ సినిమా కమిటైన సంగతి తెలిసిందే. ఈ మూవీకి ముందు ఎ.ఆర్.రెహమాన్ ను మ్యూజిక్ డైరెక్టర్ గా అనుకున్నారు కానీ.. తర్వాత ఆయన ఖాళీ లేకపోవడంతో అనిరుద్ కు ఫిక్సయినట్లు సమాచారం. పవన్ కూడా అనిరుధ్ కు గ్రీన్ సిగ్నల్ ఇచ్చేసినట్లు సమాచారం. త్వరలోనే ఈ ప్రాజెక్టు గురించి అఫీషియల్ న్యూస్ ఇవ్వబోతున్నారు. ఈ చిత్రాన్ని పవన్ మిత్రుడు - సర్దార్ గబ్బర్ సింగ్ నిర్మాత శరత్ మరారే నిర్మించబోతున్నాడు.