మరో పదేళ్లు హీరోయిన్ గా నటిస్తా

పుట్టి పెరిగింది తెలుగు నేలపైనే అయినా తమిళ జనాలకు తెగ నచ్చేసిన బ్యూటీ అంజలి. అందంతోపాటు అభినయం కూడా వచ్చిన సుందరి కావడంతో అక్కడ బాగానే నిలదొక్కుకుంది. అక్కడ పేరు తెచ్చుకున్నాకే తెలుగు ఇండస్ట్రీ ఆమె వైపు చూసింది. వెంకటేష్ - బాలకృష్ణ లాంటి సీనియర్ హీరోల పక్కన నటించడంతోపాటు అల్లు అర్జున్ తో ఐటం సాంగులో స్టెప్పులేసి అందరినీ ఆకట్టుకుంది.

పక్కింటమ్మాయిలా కనిపించే అంజలికి తెలుగులో వచ్చిన అవకాశాలన్నీ దాదాపుగా అలాంటివే వచ్చాయి. కానీ తనకు ఈ తరహా సినిమాల కంటే హర్రర్ సినిమాలే నచ్చుతాయంటోంది అంజలి. తమిళంలో లేటెస్ట్ గా సినీష్ డైరెక్షన్ లో బెలూన్ అనే హర్రర్ సినిమా చేసింది. జర్నీ ఫేం హీరో జై నటించిన ఈ చిత్రం 29న థియేటర్లకు రానుంది. తనకు దెయ్యం సినిమాలంటే చాలా ఇష్టమని.. అందుకే బెలూన్ లో నటించడానికి అంగీకరించానని అంజలి చెబుతోంది. తెలుగులోనూ ఇంతకుముందు హర్రర్ జోనర్ లలో గీతాంజలి సినిమా చేసింది. లిమిటెడ్ బడ్జెట్ లో తెరకెక్కిన ఈ చిత్రం డీసెంట్ హిట్ కొట్టింది. తాజాగా నటించిన బెలూన్ సినిమాలో ఇంట్రస్టింగ్ అంశాలెన్నో ఉన్నాయని.. హర్రర్ సినిమానే అయినా కామెడీకేమీ లోటుండదని అంటోంది అంజలి.

చూస్తూ ఉండగానే అంజలి ఇండస్ట్రీలోకి వచ్చి దశాబ్ద కాలం గడిచిపోయింది. ఓ తెలుగమ్మాయి ఇంతకాలం సక్సెస్ ఫుల్ హీరోయిన్ గా కొనసాగడం కొంచెం అరుదనే చెప్పాలి. ‘‘పదేళ్ల కెరీర్‌ కంప్లీట్ చేయడం చాలా హ్యాపీగా ఉంది. కనీసం మరో పదేళ్లు హీరోయిన్ గా నటిస్తా’’ అని అంజలి కాన్ఫిడెంట్ గా చెబుతోంది. ఆమె నమ్మకం నిజం కావాలని ఆశించేద్దాం