భారీ ధరకు 'కేజీఎఫ్ 2' మ్యూజిక్ రైట్స్.. మరో ట్రెండ్ సెట్టింగ్ ఆల్బమ్ రెడీ..!

కన్నడ సినిమా 'కేజీఎఫ్' దేశవ్యాప్తంగా సృష్టించిన సంచలనాల గురించి ప్రత్యేకంగా చెప్పాల్సిన అవసరం లేదు. పాన్ ఇండియా స్థాయిలో విడుదలైన అన్ని భాషల్లోనూ ఈ సినిమా ఘన విజయం సాధించింది. ఈ క్రమంలో దీనికి కొనసాగింపుగా వస్తున్న ''కేజీఎఫ్: చాప్టర్ 2'' కూడా సెన్సేషల్ క్రియేట్ చేయడానికి రెడీ అవుతోంది. యావత్ సినీ అభిమానులు ఆసక్తిగా ఎదురుచూస్తున్న ఈ సినిమా త్వరలో ప్రేక్షకుల ముందుకు రాబోతుంది.

'కేజీఎఫ్ 2' సినిమా ప్రీ రిలీజ్ బిజినెస్ భారీ స్థాయిలో జరిగినట్లు ట్రేడ్ వర్గాలు చెబుతున్నాయి. ఈ క్రమంలో ఆడియో రైట్స్ కూడా ఫ్యాన్సీ ధరకు అమ్ముడు పోయినట్లు తెలుస్తోంది. 'కేజీఎఫ్: చాప్టర్ 2' సినిమాకు సంబంధించిన అన్ని దక్షిణాది భాషల మ్యూజిక్ హక్కులను లహరి మ్యూజిక్ మరియు టీ సిరీస్ మ్యూజిక్ లేబుల్ సంస్థలు దక్కించుకున్నట్లు మేకర్స్ అధికారికంగా వెల్లడించారు.

'కేజీఎఫ్ -1' సినిమా విజయంలో సంగీతం కీలక పాత్ర పోషించిందనే విషయం తెలిసిందే. మ్యూజిక్ డైరెక్టర్ రవి బస్రుర్ అద్భుతమైన సంగీతం సమకూర్చాడు. ఈ క్రమంలో ఇప్పుడు 'కేజీఎఫ్ - 2' కోసం మరో ట్రెండ్ సెట్టింగ్ ఆల్బమ్ రెడీ చేసినట్లు తెలుస్తోంది. కాగా, రాకింగ్ స్టార్ యష్ హీరోగా ప్రశాంత్ నీల్ తెరకెక్కిస్తున్న ఈ సినిమాపై భారీ అంచనాలు నెలకొన్నాయి. హోంబలే ఫిలింస్ బ్యానర్ పై విజయ్‌ కిరగందూర్‌ ఈ చిత్రాన్ని భారీ బడ్జెట్ తో నిర్మిస్తున్నాడు.

'కేజీఎఫ్ 2' చిత్రంలో బాలీవుడ్‌ నటుడు సంజయ్‌ దత్‌ 'అధీరా' అనే విలన్ పాత్రలో నటిస్తున్నారు. శ్రీనిధి శెట్టి హీరోయిన్ గా నటిస్తుండగా.. బాలీవుడ్ నటి రవీనా టాండన్ కీల‌క పాత్ర‌ పోషించారు. ప్రకాష్ రాజ్ - రావు రమేష్ - ఈశ్వరీ రావు తదితరులు ఇతర ప్రధాన పాత్రల్లో నటిస్తున్నారు. ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటున్న ఈ చిత్రాన్ని వినాయక చవితి కానుకగా సెప్టెంబర్ 9న విడుదల చేయాలని మేకర్స్ ఆలోచిస్తున్నారు.