శైల‌జ కూతురు బిగ్ డీల్‌

వ‌రుస ప‌రాజ‌యాల‌తో భేజారైంది అను ఇమ్మాన్యుయేల్‌. ఆక్సిజ‌న్‌ - అజ్ఞ‌తావాసి - నా పేరు సూర్య అన్నీ భారీ డిజాస్ట‌ర్లే. ప్ర‌తికూల‌ ఫ‌లితాలు అనూకి ఐరెన్ లెగ్ అన్న ముద్రను తెచ్చాయి. దాంతో ఇక అనూ ప‌నైపోయింద‌ని ప్ర‌చారం సాగింది. టాలీవుడ్ లో ఈ అమ్మ‌డి కెరీర్ జీరో అయిన‌ట్టేన‌ని భావించారంతా. స‌రిగ్గా అలాంటి సంద‌ర్భంలో రిలీజైంది శైల‌జారెడ్డి అల్లుడు. నాగ‌చైత‌న్య - అను ఇమ్మాన్యుయేల్ - ర‌మ్య‌కృష్ణ కాంబినేష‌న్‌ లో మారుతి తెర‌కెక్కించిన ఈ చిత్రం విమ‌ర్శ‌కుల మెప్పు పొంద‌క‌పోయినా బాక్సాఫీస్ వ‌ద్ద చ‌క్క‌ని వ‌సూళ్లు సాధించ‌డం చ‌ర్చ‌కొచ్చింది. మొత్తానికి అనూకి - ఇత‌ర టీమ్‌ కి మ‌న‌సు కుదుట‌ప‌డే రిజ‌ల్ట్ ఇద‌ని మాట్లాడుకుంటున్నారంతా.

ఎట్టి ప‌రిస్థితిలో హిట్ కొట్టి ట్రాక్‌ లోకి రావాల్సిన టైమ్‌లో ఈ పాజిటివ్ టాక్ అనూకి పెద్ద స్థాయిలోనే క‌లిసొస్తోంది. తాజాగా మ‌రో భారీ మ‌ల్టీస్టార‌ర్‌ లో అనూకి ఛాన్స్ ద‌క్కింది. అది కూడా ధ‌నుష్ లాంటి బ‌డా నిర్మాత ఇచ్చిన ఆఫ‌ర్. ధ‌నుష్ - నాగార్జున‌ - ఎస్‌.జె.సూర్య‌ - అతిధీరావ్ హైద‌రీ త‌దిత‌రులు న‌టిస్తున్న మ‌ల్టీస్టార‌ర్‌ లో అనూకి చోటిచ్చార‌ట‌. ప్ర‌స్తుతం ఈ సినిమాకి కాస్టింగ్ సెల‌క్ష‌న్ జోరుగా సాగుతోంది. త‌దుప‌రి సెట్స్‌ పైకి తీసుకెళ్లేందుకు స‌న్నాహాలు చేస్తున్నారు.

వాస్త‌వానికి అనూ త‌మిళంలోనే తొలిగా ప‌రిచ‌య‌మైంది. అక్క‌డ మిస్కిన్ ద‌ర్శ‌క‌త్వం వ‌హించిన `తుప్ప‌రివాల‌న్` అనే చిత్రంలో న‌టించింది. అదే సినిమా తెలుగులో డిటెక్టివ్ పేరుతో రిలీజైన సంగ‌తి తెలిసిందే. విశాల్ ఈ చిత్రంలో క‌థానాయ‌కుడిగా న‌టించాడు. మొత్తానికి టాలీవుడ్‌ లో ప‌వ‌న్ - అల్లు అర్జున్ వంటి స్టార్లు ఇవ్వ‌లేని హిట్టు నాగ‌చైత‌న్య ఇచ్చాడు. ఇప్పుడు కెరీర్ ప‌రంగా మ‌రోసారి అనూ బిజీ అయిపోతోంద‌న్న‌మాట‌!