బాల‌కృష్ణ - బి.గోపాల్ కాంబోలో మూవీ.. స్టోరీ చెప్పేసిన ర‌చ‌యిత‌!

బోయపాటి శ్రీను-బాలయ్య కాంబినేషన్లో ప్ర‌స్తుతం ఓ చిత్రం తెర‌కెక్కుతున్న విష‌యం తెలిసిందే. ''బీబీ-3'' వర్కింగ్ టైటిల్ తో రూపొందుతున్న ఈ చిత్రంపై భారీ అంచనాలున్నాయి. ఈ చిత్రాన్ని వేసవి కానుగా రిలీజ్ చేయబోతున్నారు. అయితే.. ఈ చిత్రం తర్వాత దర్శకుడు గోపీచంద్ తో ఓ సినిమా చేయనున్నారు బాలయ్య.

'క్రాక్' సినిమాతో బ్లాక్‌బస్టర్ హిట్ కొట్టాడు దర్శకుడు గోపిచంద్ మలినేని. దీంతో.. గోపీతో సినిమాకు గ్రీన్ సిగ్నల్ ఇచ్చాడు బాలయ్య. మైత్రీ మూవీస్ సంస్థ ఈ సినిమాను నిర్మిస్తోంది. ప్రస్తుతం ప్రీ- ప్రొడక్షన్ వర్క్ జరుగుతోంది. బీబీ-3 పూర్తయిన తర్వాత వెంటనే ఈ మూవీ పట్టాలెక్కనుంది.

కాగా.. మరో మూవీ కూడా చేయబోతున్నాడు బాల‌కృష్ణ‌. సీనియర్ డైరెక్టర్ బి.గోపాల్ దర్శకత్వంలో ఈ చిత్రం తెరకెక్కబోతోంది. వీరి కాంబోలో గతంలో 'లారీ డ్రైవర్', 'రౌడీ ఇన్‌స్పెక్టర్' 'సమరసింహా రెడ్డి', 'నరసింహ నాయుడు' వంటి సినిమాలు వచ్చాయి. చాలా కాలం గ్యాప్ తర్వాత మళ్లీ మెగాఫోన్ పట్టబోతున్నారు బి.గోపాల్.

అయితే.. ఈ సినిమాకు రచయిత బుర్రా సాయి మాధవ్ కథ, మాటలు అందిస్తున్నారు. ఈ సందర్భంగా సాయి మాధవ్ మాట్లాడుతూ.. బాలకృష్ణ కెరీర్‌లో ఎమోషనల్ డ్రామాతో తెరకెక్కిన యాక్షన్ సినిమాలన్నీ సూపర్ హిట్స్ అయ్యాయని అన్నారు. బాలకృష్ణ అంటేనే.. సెంటిమెంట్ ప్లస్ ఎమోషన్ ప్లస్ యాక్షన్ అని అన్నారు రచయిత.  తాను కూడా ఈ మూడు అంశాలను మేళవిస్తూ కథ సిద్ధం చేస్తున్నట్టు చెప్పారు సాయి మాధవ్. మ‌రి, ఈ సినిమా ఎప్పుడు మొద‌లవుతుందో చూడాలి.