వినాయక్‌ లేడు.. బోయపాటితోనే పక్కా

‘ఇంటిలిజెంట్’ సినిమా చూశాక వి.వి.వినాయక్ తో పని చేయడానికి స్టార్ హీరోలెవరైనా ముందుకు రావడం కష్టమే అనుకున్నారంతా. కానీ నందమూరి బాలకృష్ణ లాంటి పెద్ద హీరో అతడికి అవకాశమిచ్చాడు. కథ రెడీ చేసుకుంటే వెంటనే సినిమా చేయడానికి సిద్ధమని చెప్పాడు. నాలుగు నెలల కిందటే వినాయక్ కు ఈ ఆఫర్ వచ్చింది. కానీ అతను బాలయ్య అంచనాలకు తగ్గట్లు పని చేయలేకపోయాడు. కొన్ని కథలు రెడీ చేసుకెళ్లాడు కానీ.. అవి బాలయ్యను సంతృప్తి పరచలేదు. దీంతో సినిమా అనుకున్న ప్రకారం మొదలు కాలేదు. ఈలోపు ఆగిందనుకున్న ‘యన్.టి.ఆర్’ ముందుకు కదిలింది. బాలయ్య బిజీ అయిపోయాడు. ఇది పూర్తయ్యాక అయినా బాలయ్య దొరుకుతాడేమో అనుకుంటే అందుకు అవకాశం లేదని తేలిపోయింది.

బాలయ్య తర్వాతి సినిమా కోసం కర్చీఫ్ వేసిన బోయపాటి శ్రీను.. ‘యన్.టి.ఆర్’ పూర్తవ్వగానే తన సినిమాను మొదలుపెట్టడానికి రంగం సిద్ధం చేసేశాడు. వీళ్లిద్దరి కాంబినేషన్లో సినిమా మొదలుపెట్టడానికి బాలయ్య ముహూర్తం కూడా చూసేశాడట. అక్టోబరు 10న ఈ చిత్రం ప్రారంభోత్సవం జరుగుతుందట. రెగ్యులర్ షూటింగ్ కూడా వెంటనే మొదలుపెట్టేస్తారని సమాచారం. మామూలుగా ఒక సినిమా అయ్యాక ఇంకో సినిమా మొదలుపెట్టడానికి బోయపాటి టైం తీసుకుంటాడు. కానీ ఈసారి అలా చేయడం లేదు. ‘జయ జానకి నాయక’ టైంలోనే బాలయ్య సినిమాకు స్క్రిప్టు దాదాపుగా రెడీ చేసేశాడు బోయపాటి. ప్రస్తుతం చిత్రీకరణలో ఉన్న చరణ్ సినిమాను పూర్తి చేయగానే బాలయ్య సినిమాలోకి వెళ్లిపోతాడు. విశేషం ఏంటంటే ప్రస్తుతం చిత్రీకరణ జరుపుకుంటున్న బోయపాటి.. బాలయ్యల సినిమాలు సంక్రాంతికి బాక్సాఫీస్ బరిలో ఉంటాయి. అదే సమయంలో వీళ్లిద్దరూ కలిసి చేసే సినిమా సెట్స్ మీద ఉంటుంది. బోయపాటి సినిమా పూర్తయ్యాక ఏమైనా వినాయక్ కు బాలయ్య ఛాన్స్ ఇస్తాడేమో చూడాలి.