బెంగాల్ టైగర్.. అగ్ని పరీక్షే

ఇంకొక్క రోజులో థియేటర్లలోకి దిగిపోతున్నాడు బెంగాల్ టైగర్. ఈ సినిమా మీద చాలామందికి చాలా ఆశలున్నాయి. ఈ సినిమా చాలామందికి అగ్ని పరీక్షగా నిలవబోతోంది. అందరికంటే పెద్ద పరీక్ష ఎదుర్కోబోతోంది సంపత్ నందియే. అతడి చివరి సినిమా ‘రచ్చ’ పెద్ద హిట్టే. అయినప్పటికీ తనేంటో రుజువు చేసుకోవాల్సిన స్థితిలో ఉన్నాడతను. పవన్ కళ్యాణ్ ను ఇంప్రెస్ చేయలేక ‘గబ్బర్ సింగ్-2’ నుంచి బయటికి వచ్చేసిన నేపథ్యంలో తనేంటో ‘బెంగాల్ టైగర్’ ద్వారా చాటి చెప్పాలని ఉన్నాడు సంపత్. ఇక హీరో రవితేజ గత సినిమా ‘కిక్-2’ పెద్ద డిజాస్టర్ గా నిలిచి ఇప్పుడు హిట్టు కొట్టి తీరాల్సిన పరిస్థితి కల్పించింది.

హీరోయిన్లు తమన్నా - రాశి ఖన్నాల పరిస్థితి కూడా ఏమంత భిన్నంగా లేదు. ‘బాహుబలి’ని పక్కనబెట్టేస్తే తమన్నా కెరీర్ ఏమంత బాగా లేదు. రాశి ఖన్నా వరుస ఫ్లాపులతో సతమతమవుతోంది. తొలిసారి స్టార్ హీరో సరసన నటించిన రాశి.. ఈ సినిమా విజయవంతమవ్వాలని గట్టిగా కోరుకుంటోంది. ఇక నిర్మాత రాధామోహన్ ఇంతకుముందు తీసినవి చిన్న సినిమాలు. తొలిసారి భారీ సినిమా నిర్మించిన ఆయన ఈ సినిమాతో పెద్ద నిర్మాతల జాబితాలోకి చేరాలనుకుంటున్నాడు. సంగీత దర్శకుడు భీమ్స్ కూడా తొలిసారి స్టార్ హీరోతో పని చేశాడు. అతను కూడా ఈ సినిమా ఫలితం కోసం ఉత్కంఠగా ఎదురు చూస్తున్నాడు. మరోవైపు మూణ్నాలుగు నెలలుగా పెద్ద సినిమాలేవీ ఆడక ఇండస్ట్రీలోనూ ఓ వెలితి ఏర్పడింది. మాస్ ప్రేక్షకులు కూడా తమ కడుపు నింపే సినిమా కోసం చూస్తున్నారు. ఈ నేపథ్యంలో ‘బెంగాల్ టైగర్’ చాలామంది చాలా ఆశలతో ఉన్నారు. మరి ఈ సినిమా ఎలాంటి ఫలితాన్నందుకుంటుందో చూడాలి.