సినిమా ప్ర‌మోష‌న్ కొత్త పుంత‌లు తొక్కుతోంది. మ‌ధ్య‌లో ఏదైనా స్పెష‌ల్ డే వ‌చ్చిందంటే దాన్ని ఏదో ర‌కంగా వాడుకొనేందుకు చిత్ర‌బృందాలు ప్లాన్ చేస్తున్నాయి. మెగా ఫ్యామిలీ హంగామా అంతా చిరు పుట్టిన రోజుకీ, ప‌వ‌న్ పుట్టిన‌రోజుకీ పూర్త‌యింద‌నుకొన్నారంతా. వినాయ‌క చ‌వితికి నంద‌మూరివారి హంగామానే ఉంటుందేమో అని ఊహించారు. కానీ గ‌ణేష్ పండ‌క్కి చెర్రీ కూడా సంద‌డి చేస్తున్నాడు. పండ‌గ‌కి ఒక రోజు ముందుగానే బాల‌కృష్ణ `డిక్టేట‌ర్‌` ఫ‌స్ట్‌ లుక్ రిలీజ్ అయ్యింది. పండ‌గ రోజు అంటే ఈ రోజు సాయంత్రం ఆరు గంట‌ల‌కు `డిక్టేట‌ర్‌`లోని పాట‌ని ఖైర‌తాబాద్ వినాయ‌కుడి ఆశీస్సుల‌తో విడుదల చేయ‌బోతున్నారు. పండ‌గ రోజు ఉద‌యాన్నే ఎన్టీఆర్ `నాన్న‌కు ప్రేమ‌తో`ఫ‌స్ట్‌ లుక్ కూడా విడుద‌లయింది.
అలా నంద‌మూరి హీరోల సంద‌డితో పాటు రామ్‌ చరణ్ కూడా త‌న సినిమా `బ్రూస్‌ లీ`కి సంబంధించి సాంగ్ మేకింగ్ వీడియోని విడుదల చేశాడు. రామ్‌ చరణ్- శ్రీను వైట్ల కలయికలో `బ్రూస్‌ లీ రూపుదిద్దుకొంటున్న విష‌యం తెలిసిందే. రకుల్ ప్రీత్ సింగ్ కధానాయిక. ఈ చిత్రంలోని 'లే ఛలో...' అనే సాంగ్ మేకింగ్ వీడియోను విడుదల చేశారు. ఇదో బీచ్ సాంగ్. యమ కలర్ ఫుల్ గా సాగిందీ పాట. ముఖ్యంగా రకుల్ ఎక్స్‌ పోజింగ్‌ తో రెచ్చిపోయిన‌ట్టు క‌నిపిస్తోంది. చిట్టి పొట్టి డ్రస్సులేసి గ్లామ‌ర్ డోసును బాగా పెంచేసిన‌ట్టు ఈ వీడియోలో స్ప‌ష్టంగా తెలిసిపోతోంది. చెర్రీ మొద‌టి టీజ‌ర్‌ లో యాక్ష‌న్ చూపించాడు. రెండో టీజ‌ర్‌ లో సెంటిమెంట్ చూపించాడు. ఇప్పుడేమో గ్లామ‌ర్ కూడా ఉంద‌ని చెబుతూ లెక్క స‌రిచేశాడు. ఇక మాస్ కోరుకొనేది ఇంత‌కంటే ఏముంటుంది! అందుకే సినిమా ఎప్పుడెప్పుడా అని ఎద‌రు చూస్తున్నారంతా! చెర్రీ వ‌చ్చేయ్ మ‌రీ...!