చిరు.. వర్మ మాటలేమైనా పట్టించుకున్నాడా?

మెగాస్టార్ చిరంజీవి రీఎంట్రీ మూవీ కథ మళ్లీ మొదటికొచ్చింది. బ్రూస్ లీ విడుదల రోజో.. దసరా రోజో ప్రకటన వచ్చేస్తుందన్నాడు చిరు. కానీ ఆ రెండు తేదీలు వెళ్లిపోయాయి. ఇంకో వారం కూడా గడిచింది. ఇప్పటిదాకా సినిమా సంగతి అతీ గతీ లేదు. రాబోయే రోజుల్లోనూ ప్రకటన వస్తుందన్న సంకేతాలేమీ కనిపించట్లేదు. మెగా క్యాంపులో మళ్లీ గందరగోళం నడుస్తోందని.. ‘కత్తి’ రీమేక్ విషయంలోనూ వెనక్కి తగ్గుతున్నారని గుసగుసలు వినిపిస్తున్నాయి. దీంతో వి.వి.వినాయక్ అసహనంతో ప్రాజెక్టు నుంచి వైదొలగాలని చూస్తున్నాడని అంటున్నారు.

బ్రూస్ లీ ఆడియో ఫంక్షన్ లో చిరంజీవి ‘కత్తి’లా ఉన్నాడంటూ వినాయక్ నొక్కి పలకడంతో వీళ్లిద్దరి కాంబినేషన్ లో ‘కత్తి’ రీమేక్ రావడం పక్కా అని అంతా అనుకున్నారు. కానీ ఇప్పుడు ‘కత్తి’ కూడా చెత్త బుట్టలోకి వెళ్లిపోయిందన్న రూమర్లు వస్తున్నాయి. ‘కత్తి’ విషయంలో పూర్తి సంతృప్తిగా ఉన్న చిరు మళ్లీ ఇలా మనసెందుకు మార్చుకున్నాడన్నది అర్థం కాని విషయం.

పోయి పోయి ఓ రీమేక్ చేసి.. తెలుగువాళ్ల పరువు తీస్తారా.. డైరెక్ట్ కథ చేసి, మన ప్రెస్టీజ్ నిలబెట్టండి అంటూ ఆ మధ్య వర్మ చేసిన ట్విట్టర్ గొడవతో చిరు ఏమైనా సందిగ్ధంలో పడిపోయాడా? ప్రతిష్టాత్మకమైన రీఎంట్రీ మూవీకి రీమేక్ ఎంచుకోవడమేంటని వెనక్కి తగ్గుతున్నాడా? లేక ఆ కథ తనకు నప్పదేమో అని వెనుకంజ వేస్తున్నాడా? ఏదేమైనా కొన్నేళ్ల నుంచి ఎంతో సహనంతో ఎదురు చూస్తున్న మెగా అభిమానులకు ఈ పరిణామాలు తీవ్ర అసహనం కలిగించడం మాత్రం ఖాయం. ఇప్పటికే ఎంతో ఓపిక పట్టారు. ఈసారి కూడా సినిమా సంగతి తేల్చకుంటే వారి ఫ్రస్టేషన్ పతాక స్థాయికి చేరడం ఖాయం.