సైరా విడుదల తేదీని ఆరోజే ప్రకటిస్తారా?

ఎవరైనా పెద్ద స్టార్ హీరో పుట్టిన రోజు వస్తుందంటే చాలు.. ఫ్యాన్స్ సోషల్ మీడియాలో కౌంట్ డౌన్లు మొదలుపెట్టి హంగామా చేస్తుంటారు.  మెగా పవర్ స్టార్ రామ్ చరణ్ బర్త్ డే మార్చ్ 27 న జరుపుకోనున్నాడు.  దీంతో ఇప్పటినుంచే అభిమానుల సందడి మొదలైంది.  బర్త్ డే అంటే ఫ్యాన్స్ చేసే సందడి ఒక్కటే కాదు కొత్త సినిమాలకు సంబంధించిన ఏదో ఒక అప్డేట్ రావడం కూడా ఆనవాయితీగా మారింది. ఈసారి చరణ్ బర్త్ డే రోజున అలాంటి స్పెషల్ అనౌన్స్మెంట్ ఒకటి ఉంటుందని సమాచారం.

చరణ్ ప్రస్తుతం రాజమౌళి దర్శకత్వంలో #RRR అనే చిత్రంలో నటిస్తున్నాడు.  ఈ సినిమా కాకుండా చరణ్ 'సైరా' అనే మెగా ప్రాజెక్టును నిర్మిస్తున్నాడు.  #RRR  సినిమాకు  సంబంధించి చరణ్ ఫస్ట్ లుక్ ను విడుదల చేసే అవకాశం ఉందని రూమర్లు వినిపిస్తున్నాయి.  అలాంటిదేమీ లేదని కూడా కొందరు అంటున్నారు.  దీని సంగతేమో కానీ చరణ్ నిర్మాతగా వ్యహరిస్తున్న 'సైరా' కు సంబంధించిన ఒక ప్రకటన మాత్రం పక్కాగా రానుందట.  'సైరా' రిలీజ్ డేట్ ను అధికారికంగా ప్రకటిస్తారని అంటున్నారు.  ఈ ఏడాది దసరాకు 'సైరా' ను విడుదల చేసే సన్నాహాలు జరుగుతున్నాయని గతంలో వార్తలు వచ్చాయి. మరి దసరా సీజన్ లో ఒక డేట్ ను కన్ఫాం చేస్తారా లేదా అనేది వేచి చూడాలి.

కొణిదెల ప్రొడక్షన్స్ బ్యానర్ పై  చరణ్ మొదటి ప్రయత్నంగా మెగాస్టార్ చిరంజీవి రీ-ఎంట్రీ ఫిలిం 'ఖైది నెంబర్ 150' నిర్మించి సూపర్ హిట్ సాధించాడు.  ఇప్పుడు మరోసారి 'సైరా' లాంటి భారీ బడ్జెట్ సినిమాను నిర్మిస్తూ అందరి దృష్టిని ఆకర్షిస్తున్నాడు.  సురేందర్ రెడ్డి దర్శకత్వంలో తెరకెక్కుతున్న 'సైరా' పై ప్రేక్షకుల్లో భారీ అంచనాలు ఉన్నాయి.