బాక్సాఫీస్ వద్ద చిరంజీవి - బాలయ్య లకు పోటీ తప్పదా..?

మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటిస్తున్న సినిమా ''ఆచార్య''. కొరటాల శివ దర్శకత్వం వహిస్తున్న ఈ చిత్రాన్ని సమ్మర్ కానుకగా మే 13న విడుదల చేయనున్నట్లు ప్రకటించారు. అయితే ఇప్పుడు 'ఆచార్య' చెప్పిన తేదీకి రాక‌పోవ‌చ్చని సినీ వర్గాల్లో టాక్ నడుస్తోంది. ఈ సినిమా షూటింగ్ ఇంకా మిగిలి ఉండటంతో విడుద‌ల తేదీ వాయిదా ప‌డే అవ‌కాశాలు ఉన్నాయని అంటున్నారు. ఇదే కనుక జరిగితే మే 14వ తేదీని లాక్ చేసుకున్న విక్టరీ వెంకటేష్ 'నారప్ప' సినిమాకి లైన్ క్లియర్ అవుతుంది. ఇక 'ఆచార్య' ఆ డేట్ న రాకపోతే మే 28న 'బీబీ3' సినిమాతో పోటీ పడే ఛాన్సెస్ ఉన్నాయని అంటున్నారు.

నందమూరి బాలకృష్ణ - డైరెక్టర్ బోయపాటి శ్రీను కాంబినేషన్ లో తెరకెక్కుతున్న హ్యాట్రిక్ మూవీ 'BB3' ని మే 28న విడుదల చేస్తామని ప్రకటించారు. ఒకవేళ 'ఆచార్య' మే 13 నుంచి తప్పుకొని అదే నెల 28కి రావాలని చూస్తే మాత్రం ఈసారి సమ్మర్ బాక్సాఫీస్ బరిలో బాలయ్య - చిరంజీవి పోటీ పడే అవకాశం ఉంది. సీనియర్ స్టార్ హీరోలిద్దరూ దశాబ్దాలుగా బాక్సాఫీస్ ప్రత్యర్థులుగా అనేక సీజన్స్ లో పోటీ పడ్డారు. మరోసారి చిరు - బాల‌య్య మ‌ధ్య పోటీ అనివార్య కానుందా లేక 'ఆచార్య' ఇంకా లేట్ కానుందా అనే విషయం మరికొన్ని రోజుల్లో తెలిసిపోతుంది. కాకపోతే మాస్ మహారాజా రవితేజ 'ఖిలాడి' చిత్రాన్ని అదే రోజు రిలీజ్ చేస్తున్నట్లు ఇప్పటికే అనౌన్స్ చేశాడు. మరి త్వరలోనే ఈ క్రేజీ ప్రాజెక్ట్స్ విడుదల తేదీలపై క్లారిటీ వస్తుందేమో చూడాలి.