ఆ సెన్సేషనల్ సినిమా ఎట్టకేలకు మొదలైంది

ధనుష్ అంటే ఏంటో పొరుగు భాషల్లోనూ తెలిసొచ్చేలా చేసిన సినిమా ‘ఆడుగళం’. అప్పటికే తమిళంలో మంచి నటుడిగా పేరు తెచ్చుకున్నప్పటికీ మిగతా భాషల వాళ్లకు అతడి గురించి పెద్దగా తెలియదు. ఐతే ‘ఆడుగళం’ సినిమాలో అద్భుత నటనతో జాతీయ అవార్డుకు ఎంపికవగానే దేశవ్యాప్తంగా ధనుష్ పేరు మార్మోగిపోయింది. అతడి గురించి అందరూ తెలుసుకోవడం.. అతడి సినిమాలు చూడ్డం మొదలుపెట్టారు. ఈ సినిమాను రూపొందించిన దర్శకుడు వెట్రిమారన్. అప్పటికే అతను ధనుష్ తో ‘పొల్లాదవన్’ అనే సినిమా చేశాడు. అది కూడా సెన్సేషనల్ హిట్టే. ‘ఆడుగళం’ తర్వాత మంచి మిత్రులుగా మారిన ధనుష్-వెట్రిమారన్ కలిసి కొన్ని సినిమాలు కూడా నిర్మించారు.

ఐతే వీళ్లిద్దరి కాంబినేషన్లో మూడో సినిమా గురించి రెండు మూడేళ్లుగా చర్చ జరుగుతోంది. వడా చెన్నై పేరుతో ఓ సినిమా తెరమీదికి వచ్చి చాలా కాలమైంది. ఏడాది నుంచి ఈ సినిమా మొదలుపెట్టడానికి ప్రయత్నాలు జరుగుతున్నాయి కానీ.. అనివార్య కారణాల వల్ల వాయిదా పడుతూ వస్తోంది. ఎట్టకేలకు బుధవారం ఈ సినిమా సెట్స్ మీదికి వెళ్లింది. ఈ చిత్రం వాయిదా పడటానికి సమంత కూడా ఒక కారణం. ముందు ఆమెనే ఈ సినిమాకు కథానాయికగా ఎంచుకున్నారు. కానీ ఈ మధ్యే ఆమె వ్యక్తిగత కారణాలతో ఈ సినిమా నుంచి తప్పుకుంది. ఆమె స్థానంలో త్రిషను హీరోయిన్‌ గా తీసుకుని.. సినిమా మొదలుపెట్టేశారు. చెన్నైలోని అండర్ వరల్డ్ మాఫియా నేపథ్యంలో ఈ సినిమా సాగుతుంది. విశేషం ఏంటంటే.. ఈ చిత్రాన్ని మూడు భాగాలుగా తెరకెక్కించబోతున్నారు. తొలి భాగం వచ్చే ఏడాది విడుదలవుతుంది. సెన్సేషనల్ కాంబినేషన్లో తెరకెక్కుతున్న ఈ చిత్రంపై ఇప్పటికే అంచనాలు భారీగా ఉన్నాయి.