పిక్ టాక్: పవర్ స్టార్ సెట్స్ లో 'గబ్బర్ సింగ్' దర్శకనిర్మాతలు..!

డైరెక్టర్ హరీష్ శంకర్ - ప్రొడ్యూసర్ బండ్ల గణేష్ కలసి 'గబ్బర్ సింగ్' వంటి బ్లాక్ బస్టర్ సినిమా తీసిన సంగతి తెలిసిందే. అయితే ఆ మూవీ విడుదలై 8 ఏళ్ళు పూర్తయిన సందర్భంగా ఇద్దరి మధ్య వివాదం చోటు చేసుకుంది. ఆ సమయంలో సోషల్ మీడియాలో ఇద్దరి మధ్య ఆసక్తికరమైన ట్వీట్ వార్ జరిగింది. కొన్ని రోజుల పాటు ఈ వివాదం ఇండస్ట్రీలో హాట్ టాపిక్ అయింది.

 అయితే ఆ తర్వాత ఇద్దరూ వేరు వేరు సందర్భాల్లో వివాదానికి ఫుల్ స్టాప్ పెట్టారు. 'అది అన్నదమ్ముల మధ్య అప్పుడప్పుడు వచ్చే చిన్న గొడవ లాంటిదని' బండ్ల అంటే.. 'మీరు నా పెద్దన్నయ్య లాంటి వారు. నా బ్లాక్ బస్టర్ ప్రొడ్యూసర్ సినిమా మనకంటే చాలా గొప్పది' అని హరీష్ శంకర్ అన్నారు. తాజాగా ఇద్దరూ కలిసి ఓ చోట దర్శనమిచ్చి ఇద్దరి మధ్య ఎలాంటి విభేదాలు లేవని తేల్చేశారు.

పవర్ స్టార్ పవన్ కళ్యాణ్ ప్రస్తుతం నటిస్తున్న 'అయ్యప్పనుమ్ కోశీయుమ్' తెలుగు రీమేక్ షూటింగ్ హైదరాబాద్ లో జరుగుతున్న సంగతి తెలిసిందే. తాజాగా బండ్ల గణేష్ - హరీష్ శంకర్ సెట్స్ కి వెళ్లి పవన్ కళ్యాణ్ తో మీట్ అయ్యారు. దీనికి సంబంధించిన ఓ ఫోటోను బండ్ల సోషల్ మీడియా మధ్యమాలలో షేర్ చేశాడు.

'బాస్ షూటింగ్ లో నా గబ్బర్ సింగ్ డైరెక్టర్ హరీష్.. నా ఫ్రెండ్ నర్రా అన్నతో కలిసి' అంటూ ట్వీట్ చేశాడు. ఇదిలా వుండగా హరీష్ శంకర్ పవన్ కళ్యాణ్ తో మరో సినిమా చేయడానికి రెడీ అవుతున్నాడు. మైత్రీ మూవీ మేకర్స్ ఈ చిత్రాన్ని నిర్మిస్తారు. అలానే బండ్ల గణేష్ కూడా పవన్ తో ఓ సినిమా చేయడానికి సన్నాహకాలు చేసుకుంటున్నాడు.