చైతూ సినిమాకు గౌతమ్ మీనన్ అన్యాయం

తనకు తొలి విజయాన్నందించడమే కాక.. ఒక క్లాసిక్ మూవీని గిఫ్టుగా ఇచ్చాడని.. గౌతమ్ మీనన్ మీద చాలా గౌరవమే చూపించాడు అక్కినేని నాగచైతన్య. ‘సాహసం శ్వాసగా సాగిపో’ కోసం తన డేట్లను చాలా వృథా చేసినా.. అదనంగా డేట్లు ఇవ్వాల్సి వచ్చినా.. తన సినిమాను రిలీజ్ చేయకుండా చాలా కాలం వెయిట్ చేయించినా.. అన్నింటినీ భరించాడు. ‘ప్రేమమ్” రిలీజ్ డేట్ ఇవ్వగానే దానికి పోటీగా అదే రోజుకు ‘సాహసం శ్వాసగా సాగిపో” రిలీజ్ డేట్ ప్రకటించినా కూడా ఊరుకున్నాడు. ఇవన్నీ భరించి.. ‘సాహసం శ్వాసగా సాగిపో” విడుదల కోసం తాను ఎంతగానో తపించి.. విడుదలకు ముందు సినిమాను ప్రమోట్ చేయడంలో కూడా కీలక పాత్ర పోషించాడు చైతూ.

కానీ తన సినిమా విషయంలో గౌతమ్ మీనన్ కు మాత్రం ఎలాంటి కన్సర్న్ లేకపోవడమే ఆశ్చర్యం కలిగిస్తోంది. రిలీజ్ డేట్ ప్రకటించడం కోసం పెట్టిన ప్రెస్ మీట్లో పాల్గొనడం మినహాయిస్తే ‘సాహసం శ్వాసగా సాగిపో” కోసం గౌతమ్ చేసిందేమీ లేదు. దీని తమిళ వెర్షన్ ను మాత్రం ట్విట్టర్లో తరచుగా ప్రమోట్ చేస్తున్న గౌతమ్.. తెలుగు వెర్షన్ గురించి మాట్లాడితే ఒట్టు. తమిళ వెర్షన్ 600కు పైగా స్క్రీన్లలో రిలీజవుతోందని.. ప్రేక్షకుల సపోర్ట్ కావాలని కోరడం.. సినిమా విడుదలయ్యాక బ్లాక్ బస్టర్ హిట్ చేసినందుకు థ్యాంక్స్ చెప్పడం.. ఇలా తమిళ వెర్షన్ విషయంలో మాత్రం తరచుగా స్పందిస్తున్న గౌతమ్.. తెలుగు వెర్షన్ ఊసే ఎత్తట్లేదు. శింబు వల్ల అంతగా ఇబ్బంది ఎదురైనా.. అతణ్ని ఆకాశానికెత్తేస్తూ.. ఎక్కడా చైతూ ప్రస్తావన తేవట్లేదు. తెలుగు వెర్షన్ నిర్మాతలతో.. చైతూతో అతడికేమైనా ఇబ్బందులున్నాయో ఏమో తెలియదు కానీ.. తన దర్శకత్వంలో వచ్చిన సినిమాకు గౌతమ్ చేస్తున్న అన్యాయం మాత్రం జనాలకు బాగానే అర్థమవుతోంది.

Like Us on Facebook : https://www.facebook.com/Tupakidotcom/