గోపీచంద్ సినిమా పేరు... సౌఖ్యం

సినిమా టైటిళ్ల విష‌యంలో చాలా మంది హీరోలు సెంటిమెంట్‌ ని ఫాలో అవుతుంటారు. మ‌హేష్‌ బాబు ఇదివ‌ర‌కు త‌న సినిమాల పేర్ల‌లో మూడ‌క్ష‌రాలు   ఉండేలా జాగ్ర‌త్త‌ప‌డేవారు. యాక్ష‌న్ హీరోగా పేరు తెచ్చుకొన్న గోపీచంద్‌ కి కూడా అలాంటి సెంటిమెంటే ఉంది. గోపీ త‌న సినిమాల‌కి రెండు అక్ష‌రాల పేరుండేలా జాగ్ర‌త్త‌ప‌డుతుంటారు. చివ‌ర్లో మాత్రం సున్నా ఉండాల్సిందే అంటుంటారు. య‌జ్ఞం - ల‌క్ష్యం - శౌర్యం - శంఖం - లౌక్యం ఇలా ఆయ‌న సినిమాల పేర్లు సాగుతుంటాయి. విల‌న్‌ గా న‌టిస్తున్న‌ప్పుడు ఆయ‌న‌కి విజ‌యాలు తెచ్చిన సినిమాల పేర్లు కూడా రెండ‌క్ష‌రాల‌తోనే ఉంటాయి. జ‌యం - వ‌ర్షం... సినిమాల‌న్న‌మాట‌.

మ‌హేష్‌ లాంటి కొద్దిమంది క‌థానాయ‌కులు సెంటిమెంట్ నుంచి బ‌య‌టికొచ్చినా గోపీ మాత్రం ఇప్ప‌టికీ ఫాలో అవుతున్నాడు. తాజాగా ఎ.ఎస్‌.ర‌వికుమార్ చౌద‌రి ద‌ర్శ‌క‌త్వంలో చేస్తున్న కొత్త సినిమాకి కూడా రెండ‌క్ష‌రాలతో సౌఖ్యం అనే పేరును డిసైడ్ చేస్తున్న‌ట్టు తెలిసింది. సినిమా ఎంట‌ర్‌ టైన్‌ మెంట్ బేసిస్‌ లో ఫ్యామిలీ ఎమోష‌న్స్‌ తో సాగుతుంది కాబ‌ట్టి అందుకు త‌గ్గ‌ట్టుగా సౌఖ్యం అనే పేరు పెడితేనే బాగుంటుంద‌ని, పైగా గోపీకి సెంటిమెంట్ కూడా క‌లిసొస్తుంద‌ని భావిస్తున్నార‌ట‌.

 భ‌వ్య క్రియేష‌న్స్ సంస్థ‌లో రూపొందుతున్న ఈ సినిమాలో గోపీ స‌ర‌స‌న రెజీనా న‌టిస్తోంది. చిత్రీక‌ర‌ణ చివ‌రి ద‌శ‌కు చేరుకొన్న‌ట్టు స‌మాచారం. డిసెంబ‌రులో చిత్రాన్ని ప్రేక్ష‌కుల ముందుకు తీసుకొచ్చేందుకు స‌న్నాహాలు చేస్తున్నారు. `పిల్లా నువ్వు లేని జీవితం` త‌ర్వాత ర‌వికుమార్ చౌద‌రి చేస్తున్న చిత్ర‌మిది. గోపీ కూడా లౌక్యం - జిల్‌ లాంటి హిట్ సినిమాల త‌ర్వాత సౌఖ్యం చేస్తున్నాడు. భారీ అంచ‌నాల మ‌ధ్య తెర‌కెక్కుతున్న ఈ సినిమాకి ఇండ‌స్ట్రీలోనూ మంచి బ‌జ్ క‌నిపిస్తోంది.