ఆ డైరెక్టర్లకు గోపీచంద్ షాక్

టాలీవుడ్లో కష్ట కాలం ఎదుర్కొంటున్న కథానాయకుల్లో గోపీచంద్ ఒకడు. ఒకప్పుడు అతను అతను మినిమం గ్యారెంటీ హీరోగా ఉండేవాడు. కానీ తర్వాత ట్రాక్ తప్పాడు. మారుతున్న ప్రేక్షకుల అభిరుచికి తగ్గట్లు సినిమాలు చేయలేక వెనుకబడిపోయాడు. గత ఆరేడేళ్లలో గోపీకి దక్కిన ఏకైక హిట్ ‘లౌక్యం’ మాత్రమే. దీనికి ముందు.. తర్వాత చాలా సినిమాలు గోపీచంద్‌ ను నిరాశనే మిగిల్చాయి. చివరగా ‘పంతం’ అనే సినిమా చేశాడు. గోపీకిది 25వ సినిమా. ఆ పేరు చెప్పి గట్టిగా ప్రమోట్ చేశారు. కానీ ఫలితం లేకపోయింది. ఆ సినిమా ఫెయిల్యూర్ తర్వాత ఏం చేయాలో పాలుపోని స్థితిలో పడ్డాడతను. ఐతే గోపీకి సినిమాలు లేకుండా ఏమీ లేదు. తనతో సినిమా చేయడానికి ముగ్గురు నలుగురు దర్శకులు ముందుకు రావడం విశేషం.

ఐతే గోపీతో సినిమా కోసం ట్రై చేసిన దర్శకులకు కూడా హిట్టు చాలా అవసరం. గోపీతో ‘లక్ష్యం’- ‘లౌక్యం’ లాంటి సూపర్ హిట్లు తీసిన శ్రీవాస్‌ తో పాటు అతడితో ‘గౌతమ్ నంద’ చేసిన సంపత్ నంది కూడా సినిమా కోసం ట్రై చేశారు. కానీ ఇద్దరినీ ఊరించి ఊరించి చివరికి హ్యాండిచ్చేశాడట గోపీ. చివరికతను తిరు సుబ్రహ్మణ్యం అనే కొత్త దర్శకుడితో సినిమా చేయడానికి అంగీకరించినట్లు సమాచారం. అతను కొంచెం కొత్తగా అనిపించే కథను చెప్పాడట. ప్రస్తుతం ప్రేక్షకుల అభిరుచి చాలా మారిపోయిందని.. ఇంతకుముందులాగా రొటీన్ కథలతో వెళ్తే ప్రయోజనం ఉండదని భావించి గోపీ అతడికే ఓటేసినట్లు తెలుస్తోంది. ‘సాక్ష్యం’తో షాక్ తిన్న శ్రీవాస్.. ‘గౌతమ్ నంద’ తర్వాత స్ట్రగులవుతున్న సంపత్.. గోపీ మీద ఆశలు పెట్టుకుని ఇప్పుడు నిరాశకు గురవుతున్నారు. వాళ్లతో తర్వాత చేస్తానని చెప్పి తిరు సినిమానే మొదలుపెట్టడానికి గోపీ రెడీ అయినట్లు సమాచారం.