న్యూ పోస్టర్: మహేష్ పై మనసు పారేసుకుందే!

వరస హిట్లతో దూసుకుపోతున్న అనిల్ రావిపూడి దర్శకత్వంలో సూపర్ స్టార్ మహేష్ బాబు హీరోగా తెరకెక్కుతున్న చిత్రం 'సరిలేరు నీకెవ్వరు.  భారీ అంచనాలు నడుమ తెరకెక్కుతున్న ఈ చిత్రం సంక్రాంతికి ప్రేక్షకుల ముందుకు రానుంది.  విడుదలకు నెలకంటే తక్కువ సమయమే ఉండడంతో ఈ సినిమా ప్రచార కార్యక్రమాలు జోరుగా సాగుతున్నాయి. ఇప్పటికే టీజర్.. రెండు లిరికల్ సాంగ్స్ రిలీజ్ చేసిన 'సరిలేరు నీకెవ్వరు' టీమ్ తాజాగా మూడవ పాటకు సంబంధించిన పోస్టర్ ను విడుదల చేసింది.

'హీ ఈజ్ సో క్యూట్' అంటూ సాగే ఈ పాట డిసెంబర్ 16 సాయంత్రం 5:04 గంటలకు విడుదల చేస్తామని 'సరిలేరు నీకెవ్వరు' టీమ్ ప్రకటించారు. ఈ సినిమాలో మహేష్ బాబుకు జోడీగా రష్మిక మందన్న హీరోయిన్ గా నటిస్తున్న సంగతి తెలిసిందే.   ఈ సాంగ్ రిలీజ్ పోస్టర్ లో మహేష్ బాబు - రష్మిక ఇద్దరూ ఉన్నారు.  మహేష్ బాబు నలుపు రంగు టీ షర్టు - నీలం రంగు షర్టు ధరించి ఒక ట్రావెల్ బ్యాగ్ భుజానికి తగిలించుకుని ఒకవైపు చూస్తూ ఉన్నాడు.  వెనక ట్రైన్ ఫుట్ బోర్డ్ పై రష్మిక చలాకీగా వేలాడుతూ ఉంది. వైట్ టాప్ - లైట్ బ్లూ కలర్ స్కర్ట్ ధరించి క్యూట్ గా కనిపిస్తోంది.  పళ్ళ మధ్యలో రోజా పువ్వు కాడను అడ్డంగా పట్టుకుని 'మహేష్ వెనక్కు తిరగడమే ఆలస్యం.. లవ్ ప్రపోజ్ చేస్తా' అన్నట్టుగా ఎక్స్ ప్రెషన్ ఇచ్చింది.  వెనకుండే ఈ సుందరాంగిని మన హ్యాండ్సమ్ హీరో గమనించాడో లేదో గానీ ఏమీ పట్టనట్టు ఏటో చూస్తున్నాడు.  ఇలాంటి సందర్భంలోనే రష్మిక 'హీ ఈజ్ సో క్యూట్' అనే ఇంగ్లీష్ పదాలతో ప్రారంభమయ్యే తెలుగు పాటను అందుకుంటుంది. పోస్టర్ అదిరిపోయింది. మహేష్ - రష్మిక జోడీ సూపర్ గా ఉంది.

ఈ సినిమాలో విజయశాంతి.. ప్రకాష్ రాజ్.. రాజేంద్రప్రసాద్.. సంగీత.. హరితేజ.. బండ్ల గణేష్.. వెన్నెల కిషోర్ ఇతర కీలక పాత్రల్లో నటించారు. దేవీ శ్రీప్రసాద్ ఈ సినిమాకు సంగీత దర్శకుడు. ఈ సినిమాను అనిల్ సుంకర నిర్మిస్తున్నారు.  ఈ చిత్రానికి దిల్ రాజు సమర్పకుడిగా వ్యవహరిస్తున్నారు.  జనవరి 11 న 'సరిలేరు నీకెవ్వరు' ప్రేక్షకుల ముందుకు రానుంది.