ఎనర్జిటిక్ హీరో.. వాట్ ఎ ప్లానింగ్ గురూ

టీనేజీలోనే హీరో అయిపోయాడు.. తొలి సినిమా ‘దేవదాసు’తో సూపర్ హిట్ కొట్టాడు.. రెండో సినిమాకే సుకుమార్ లాంటి విలక్షణ దర్శకుడితో పని చేసే అవకాశం అందుకున్నాడు. ‘జగడం’తో నటుడిగా మంచి పేరు సంపాదించాడు. ఆ తర్వాత ‘రెడీ’ లాంటి ట్రెండ్ సెట్టింగ్ మూవీలో నటించి తారా పథానికి దూసుకెళ్లాడు. కానీ ఆరంభంలో తనకొచ్చిన పేరును నిలెబెట్టుకోవడంలో మాత్రం రామ్ సక్సెస్ కాలేకపోయాడు. వరుస ఫ్లాపులతో ఓ గత ఏడాది వరకు అతడి పరిస్థితి అగమ్య గోచరంగా కనిపించింది. ఐతే ఈ ఏడాది జనవరి 1న ‘నేను శైలజ’తో శుభారంభం చేసిన రామ్.. ఇప్పుడు మాంచి ఊపుమీదున్నాడు.

వరుసగా ఆసక్తికర ప్రాజెక్టులు తెరమీదికి తెస్తూ వచ్చే రెండు మూడేళ్లకు ఖాళీ లేకుండా చూసుకుంటున్నాడు రామ్. అతను ఓకే చేసిన వాళ్లలో సక్సెస్ ఫుల్ దర్శకులూ ఉన్నారు.. ఫ్లాపులతో కొట్టుమిట్టాడుతున్నవాళ్లూ ఉన్నారు. ప్రస్తుతం ‘కందిరీగ’ ఫేమ్ సంతోష్ శ్రీనివాస్ దర్శకత్వంలో ఓ సినిమా చేస్తున్నాడు రామ్. సంతోష్ చివరి సినిమా ‘రభస’ ఎంత పెద్ద డిజాస్టరో తెలిసిందే. దీని తర్వాత పటాస్.. సుప్రీమ్ చిత్రాల దర్శకుడు అనిల్ రావిపూడితో ఓ సినిమా కమిటయ్యాడు. ఇందులో రామ్ గుడ్డివాడి పాత్ర పోషిస్తుండటం విశేషం. ఇదయ్యాక ‘తొలి ప్రేమ’ కరుణాకరన్‌ తో సినిమా చేయబోతున్నాడు ఎనర్జిటిక్ హీరో. వీళ్లిద్దరి కాంబినేషన్లో ఇంతకుముందు వచ్చిన ‘ఎందుకంటే ప్రేమంట’ పెద్ద ఫ్లాప్. అయినా రామ్ మరోసారి కరుణాకరన్ తో పని చేయడానికి సిద్ధమవడం ఆశ్చర్యమే. దీని తర్వాత తనకు ‘నేను శైలజ’తో మరపురాని సినిమా అందించిన కిశోర్ తిరుమల తోనే మరో సినిమా చేయనున్నాడు. మొత్తానికి వచ్చే రెండేళ్ల వరకు రామ్ ఖాళీగా ఉండే అవకాశమే లేదు. ఆసక్తికర ప్రాజెక్టుల్ని లైన్లో పెట్టిన రామ్.. వీటితో ఎలాంటి ఫలితాందుకుంటాడో చూడాలి.