'జాతి రత్నాలు' క్రేజ్‌ కు అడ్వాన్స్‌ బుకింగ్‌ సాక్ష్యం

నవీన్ పొలిశెట్టి హీరోగా ఫరీయా అబ్దుల్లా హీరోయిన్‌ గా అనుదీప్ దర్శకత్వంలో మహానటి దర్శకుడు నాగ్ అశ్విన్‌ నిర్మాణంలో రూపొందిన 'జాతి రత్నాలు' మరి కొన్ని గంటల్లో ప్రేక్షకుల ముందుకు రాబోతుంది. ఈ సినిమా ను నాగ్‌ అశ్విన్‌ నిర్మించడం ఒక ఎత్తు అయితే సినిమాకు చేసిన పబ్లిసిటీతో హైప్ తీసుకు రావడం మరో ఎత్తు. నాగ్ అశ్విన్‌ ప్రాజెక్ట్‌ అవ్వడం వల్ల తప్పకుండా బాగుంటుంది అనే నమ్మకం ఒక వర్గం ప్రేక్షకుల వరకు ఉండేది. కాని నవీన్ పొలిశెట్టితో పాటు చిత్రంలో నటించిన రాహుల్‌ రామకృష్ణ మరియు ప్రియదర్శిలు ఇంకా హీరోయిన్ ఫరీయాలు చేసిన పబ్లిసిటీ ఈవెంట్ లు అన్నీ ఇన్నా కావు. సోషల్ మీడియాలో వీరు నలుగురు గత మూడు నాలుగు వారాలుగా చేస్తున్న హంగామా అంతా ఇంతా కాదు. ప్రతి బుల్లి తెర షోల్లో కనిపించి మెప్పించారు. సినిమా గురించి అంతా మాట్లాడుకునేలా చేశారు. ఆ బజ్‌ కారణంగానే భారీ అడ్వాన్స్ బుకింగ్ నమోదు అవుతుంది.

సినిమాను రేపు శివరాత్రి సందర్బంగా ప్రేక్షకుల ముందుకు తీసుకు రాబోతున్నారు. ఈ సినిమాకు పోటీగా శ్రీకారం సినిమా తో పాటు గాలి సంపత్ సినిమాలు కూడా విడుదల అవుతున్నాయి. అయినా కూడా జాతి రత్నాలు సినిమా కు భారీ ఎత్తున అడ్వాన్స్ బుకింగ్ అవుతున్న నేపథ్యంలో ఖచ్చితంగా మంచి ఓపెనింగ్ కలెక్షన్స్ ను రాబట్టడం ఖాయం అన్నట్లుగా కనిపిస్తుంది. అడ్వాన్స్ బుకింగ్‌ చూస్తుంటేనే సినిమా పై జనాల్లో ఏ రేంజ్‌ లో అంచనాలు ఉన్నాయో అర్థం చేసుకోవచ్చు. కనుక సినిమా ఒక మోస్తరుగా ఉన్నా కూడా తప్పకుండా మంచి వసూళ్లు నమోదు అవ్వడం మాత్రం ఖాయం.