గోవా నుంచి హైదరాబాద్ వచ్చి తన మేనివన్నెల వయ్యారంతో కొన్నాళ్లపాటు ఇక్కడ స్టార్ హీరోయిన్ రేంజ్ కు చేరింది ఇలియానా. జులాయి సినిమా తర్వాత ఇక్కడ నుంచి పెట్టెబేడా సర్దుకుని ముంబయికి మకాం మార్చేసింది. బాలీవుడ్ లో గుర్తింపు తెచ్చుకోవాలని తెగ ప్రయత్నాలు చేస్తోంది. ఇలియానాకు హీరోయిన్ గా ఛాన్సులయితే వస్తున్నాయి టాలీవుడ్ లో వచ్చిన స్టార్ హీరోయిన్ స్టేటస్ మాత్రం బాలీవుడ్ లో అందని చందమామే అయింది.
ఇలియాానా తన హిందీ సినిమా ప్రమోషన్ల కోసం ఇక్కడకు ఎప్పుడొచ్చినా తెలుగు సినిమాలు ఎందుకు చేయడం లేదని మీడియా చేయడం లేదని అడిగితే ఇక్కడ ఛాన్సులు రావడం లేదని సింపుల్ గా ఆన్సరిస్తోంది. అస్సలు విషయం మాత్రం వేరే ఉంది. ఈ నాజూకు నడుము సుందరికి టాలీవుడ్ కు తిరిగి రావడం ఏమాత్రం ఇష్టం లేదట. అందుకే ఆమెకు టాలీవుడ్ నుంచి ఆఫర్లు వస్తున్నా రెమ్యునరేషన్ చాలదనో.. ఇంకోటో చెప్పి తిప్పి పంపేస్తోంది. రామ్ చరణ్ రీసెంట్ మూవీ ధ్రువలో ముందు ఇలియానా తీసుకుందామని అనుకున్నారు. కానీ ఆమె అందుకు నో చెప్పింది. ఈ మధ్య ఓ టాప్ ప్రొడ్యూసర్ స్టార్ హీరో పక్కన హీరోయిన్ గా నటించమని అడిగినా ఇంట్రస్ట్ లేదని నిరాకరించింది.
రీసెంట్ గా తమిళంలో హిట్టయిన భోగన్ సినిమాను తెలుగులో రవితేజతో రీమేక్ చేద్దామని కొందరు నిర్మాతలు అనుకున్నారు. హీరోయిన్ గా నటించమని ఇలియానాను అడిగితే కుదరదని చెప్పి వాళ్లను వెనక్కి పంపేసిందట. దాంతో వాళ్లు క్యాథరిన్ థ్రెసాను తీసుకున్నారు. ఇలియానా వాలకం చూశాక ఓ పాత సినిమాలో ‘మేడలో చేరిన చిలకమ్మ వాడనే మరిచిందోయమ్మ’ అనే పాట గుర్తొస్తే ఎంత మాత్రమూ తప్పు కాదు.