ఈ సారి ప్రేమ పండిస్తున్న ఇంద్రగంటి

టాలీవుడ్ మెచ్చదగ్గ ఈతరం దర్శకులలో ఇంద్రగంటి మోహనకృష్ణ పేరు తప్పకుండా ఉంటుంది. కామెడీ సినిమాలు తీయడంలో.. నవ్వుల సన్నివేశాలను రాయడంలోను తన శైలితో ఎంతో గుర్తింపు పొందిన ఈ డైరెక్టర్.. ఒక్క ద్వంద్వార్ధం వినిపించకుండా.. సింపుల్ డైలాగ్స్ తోనే తెగ నవ్వించేస్తుంటాడు.

ఇప్పటివరకూ కామెడీ సినిమాలే కాదు.. రొమాంటిక్ థ్రిల్లర్ ను కూడా తెరకెక్కించిన ఇంద్రగంటి మోహనకృష్ణ.. ఇప్పుడు సమ్మోహనం అంటూ మరో చిత్రం షూటింగ్ కూడా చేసేస్తున్నాడు. సుధీర్ బాబు హీరోగా.. అదితి రావు హైదరి హీరోయిన్ గా నటిస్తున్న ఈ చిత్రం షూటింగ్ కూడా శరవేగంగా సాగుతోంది. ఈసారి తాను కామెడీ మూవీ చేయడం లేదని.. ఓ ప్యూర్ లవ్ స్టోరీ చేస్తున్నట్లు చెప్పాడు ఇంద్రగంటి. నిజ జీవిత గాధ నుంచి స్ఫూర్తి తీసుకుని ఈ కథను రాసుకున్నట్లు చెప్పిన దర్శకుడు.. లీడ్ పెయిర్ తో పాటు.. మొత్తం ఐదు పాత్రల మధ్య నడిచే ఆసక్తికరమైన సన్నివేశాలు.. కథనం ఆకట్టుకునేలా రూపొందిస్తున్నట్లు తెలిపాడు.

సమ్మోహనం మూవీ షూటింగ్ ప్రస్తుతం హిమాచల్ ప్రదేశ్ లో జరుగుతోంది. అందమైన లొకేషన్స్ తో పాటు.. అబ్బురపరిచే ప్రాంతాలను కూడా పిక్చరైజ్ చేస్తున్నామని.. ఈ చూడచక్కని సుందరదృశ్యాలు విజువల్ గా ఆకట్టుకోవడమే కాకుండా.. తన కథకు మరింత విలువను అందిస్తాయని అంటున్నాడు ఇంద్రగంటి మోహనకృష్ణ.