#ల‌వ్ స్టోరి: ఆన్ లైన్ బుకింగ్ లో చాలా కాలానికి జోష్

ఇటీవ‌ల విడుద‌లైన కొన్ని సినిమాల‌కు మంచి రివ్యూలు వ‌చ్చాయి. వాటికి ఆరంభ వ‌సూళ్లు ఫ‌ర్వాలేద‌నిపించినా కానీ చివ‌రికి బాక్సాఫీస్ వ‌ద్ద అంతిమ ఫ‌లితం ఆశించినంత‌గా లేదు. రాజ రాజ చోర- ఎస్ఆర్ కళ్యాణమండపం చిత్రాల‌కు చ‌క్క‌ని స్పంద‌న‌లు వ‌చ్చినా క‌లెక్ష‌న్లు రాలేదు. ఇక ఇటీవ‌ల విడుద‌లైన‌ సీటీమార్ కి టాక్ తో పాటు వ‌సూళ్లు ద‌క్కాయి. గోపిచంద్ కెరీర్ బెస్ట్ అంటున్నారు.

అయితే ఇకపై రిలీజ్ కి రానున్న సినిమాల్లో ది బెస్ట్ ఏదీ? అన్న చ‌ర్చ సాగుతోంది. స‌రైన టైమ్ లో నాగ‌చైత‌న్య‌- సాయిప‌ల్ల‌వి జంట‌గా క‌మ్ముల తెర‌కెక్కించిన ల‌వ్ స్టోరి విడుద‌లవుతోంది. ఈ సినిమాకి తొలి నుంచి బ‌జ్ ఉంది. పాట‌లు టీజ‌ర్ ట్రైల‌ర్ ప్ర‌తిదీ జ‌నాల‌కు క‌నెక్ట‌య్యాయి. అందుకే చాలా కాలానికి ఆన్ లైన్ బుకింగుల్లో ల‌వ్ స్టోరి హ‌వా చూపిస్తోంద‌ని టాక్ వినిపిస్తోంది. బుక్ మై షో స‌హా ప‌లు వెబ్ సైట్ల‌లో జోష్ క‌నిపిస్తోంది. అన్ని ఫార్మాలిటీస్ పూర్తి చేసుకుని విడుద‌ల‌కు సిద్ధంగా ఉన్న ఈ సినిమా టిక్కెట్లు ఆన్ లైన్ లో వారం ముందే అందుబాటులో ఉండ‌డంతో ఇప్ప‌టికే థియేట‌ర్లు ఫిల్ అవుతున్నాయి.

హైద‌రాబాద్ లో ఏఎంబీ మాల్ స‌హా అన్ని మ‌ల్టీప్లెక్సుల్లో అడ్వాన్స్ బుకింగ్స్ బావున్నాయి. మునుముందు వేగంగా బుక్ అయిపోయి టిక్కెట్లు దొర‌క‌వ‌నే స‌న్నివేశం ఉంద‌ట‌. ఏపీకి కాబోయే ఎగ్జిక్యూటివ్ క్యాపిట‌ల్ విశాఖ ప‌ట్నం.. విజ‌య‌వాడ .. తిరుప‌తిలోనూ ఆన్ లైన్ బుకింగుల జోరు కొన‌సాగుతోంది. దీంతో చిత్ర‌బృందం ఈ ఆనందాన్ని ఓ పోస్టర్ వేసి మ‌రీ అంద‌రితో పంచుకుంది.