సుక్కుకు ఎదురుచూపులు తప్పవా

రంగస్థలం లాంటి ఇండస్ట్రీ హిట్ కొట్టాక సుకుమార్ కు మహేష్ బాబు నుంచి ఆఫర్ రావడం వెంటనే ఒప్పేసుకుని అదే మైత్రి బ్యానర్ లో చేస్తున్నట్టు ప్రకటన ఇవ్వడం చకచకా జరిగిపోయాయి. అయితే అంత వేగంగా తర్వాతి పరిణామాలు మాత్రం కనిపించడం లేదు. మహేష్ ను మెప్పించేలా సుక్కు కథను చెప్పడంలో ఫెయిల్ అవుతున్నాడని అందుకే ఆలస్యం తప్పేలా లేదని కాస్త గట్టి టాకే వినిపిస్తోంది. మహర్షి మహా అయితే ఇంకో నెలన్నరలో పూర్తయిపోతుంది. కీలక భాగం మొత్తం షూట్ చేసేసారు. పాటల చిత్రీకరణకు పెద్దగా టైం పట్టకపోవచ్చు.

ఏప్రిల్ 25 మహర్షి విడుదలయ్యేలోపే తన కొత్త సినిమా ఫిక్స్ చేసుకుంటే ఎక్కువ గ్యాప్ రాకుండా మహేష్ కు హెల్ప్ అవుతుంది. అసలు మహర్షే లేట్ గా స్టార్ట్ అయ్యింది. ముగ్గురు నిర్మాతల మధ్య అండర్ స్టాండింగ్ సమస్యతో పాటు లొకేషన్స్ కు సంబంధించిన చిక్కులు రావడంతో అనుకున్న టైం కన్నా లేట్ గానే మొదలుపెట్టారు. ఇప్పుడు అందిన సమాచారం మేరకు మహేష్ బాబు అనిల్ రావిపూడి వైపే మొగ్గు చూపుతున్నట్టు తెలిసింది. లైన్ ఆల్మోస్ట్ ఓకే అయ్యిందని మహర్షి షూటింగ్ పూర్తయ్యే లోపు పూర్తి స్క్రిప్ట్ వినిపిస్తానని మాట ఇవ్వడంతో ప్రిన్స్ నో చెప్పడానికి అవకాశం లేకపోయింది.

ఆ లోపు సుకుమార్ కనక మెప్పించేలా మరో కథ చెప్పకపోతే ఆఫర్ అనిల్ రావిపూడి ఎగరేసుకుపోతాడు. అనిల్ సినిమాకు నిర్మాత ఎవరు అనేది కూడా తెలియాల్సి ఉంది. 14 రీల్స్ ఏఎంబి సినిమాస్ కలిసి నిర్మిస్తాయని వినికిడి. ఎఫ్2 బ్లాక్ బస్టర్ సక్సెస్ తర్వాత అనిల్ రావిపూడి ఎవరితో చేయబోతున్నాడో చెప్పకుండా గుట్టు మైంటైన్ చేస్తున్నాడు. సో ప్రిన్స్ తో ఉంటుందా లేదా అనేది ఈ వారంలోపే తేలిపోయే అవకాశాలు ఉన్నాయట