'మాస్ట్రో' ఓటీటీ రిలీజ్ డేట్ ఫిక్స్..!

యూత్ స్టార్ నితిన్ హీరోగా నటిస్తున్న లేటెస్ట్ మూవీ ''మాస్ట్రో''. మేర్లపాక గాంధీ దర్శకత్వంలో ఈ బ్లాక్ క్రైమ్ కామెడీ థ్రిల్లర్ రూపొందుతోంది. ఇది నితిన్ కెరీర్ లో 30వ చిత్రం. కరోనా సెకండ్ వేవ్ పరిస్థితుల కారణంగా ఈ సినిమా థియేట్రికల్ రిలీజ్ స్కిప్ చేసి, డైరెక్ట్ ఓటీటీ రిలీజ్ కు రెడీ అయింది. ప్రముఖ ఓటీటీ ఫ్లాట్ డిస్నీ ప్లస్ హాట్ స్టార్ తో మాస్ట్రో డీల్ కుదుర్చుకుంది. తాజాగా ఈ సినిమా విడుదల తేదీని మేకర్స్ అధికారికంగా ప్రకటించారు.

'మాస్ట్రో' చిత్రాన్ని సెప్టెంబర్ 17 నుంచి హాట్ స్టార్ లో స్ట్రీమింగ్ కి పెడుతున్నట్లు చిత్ర బృందం తెలిపింది. డిస్నీ ప్లస్ హాట్ స్టార్ లో డైరెక్ట్ ఓటీటీలో విడుదల అవుతున్న ఫస్ట్ తెలుగు సినిమా ఇది. ఈ సందర్భంగా సినిమాలోని ప్రధాన తారాగణం అంతా ఉన్న ఓ పోస్టర్ ని రిలీజ్ చేశారు. కాగా, హిందీ బ్లాక్ బస్టర్ హిట్ 'అంధాదున్' చిత్రానికి అధికారిక తెలుగు రీమేక్ 'మాస్ట్రో'. ఇందులో నితిన్ అంధుడిగా కనిపించనున్నారు. ఇస్మార్ట్ బ్యూటీ నభా నటేష్ హీరోయిన్ గా నటిస్తుండగా.. మిల్కీ బ్యూటీ తమన్నా భాటియా కీలక పాత్రలో కనిపించనుంది.

ఇప్పటికే విడుదలైన 'మాస్ట్రో' ఫస్ట్ లుక్ - టీజర్‌ - ట్రైలర్ - సాంగ్స్ మంచి రెస్పాన్స్ తెచ్చుకున్నాయి. రాజ్ కుమార్ ఆకెళ్ల సమర్పణలో శ్రేష్ఠ మూవీస్ బ్యానర్ పై ఎన్.సుధాకర్ రెడ్డి - నికిత రెడ్డి ఈ చిత్రాన్ని నిర్మిస్తున్నారు. మహతి స్వర సాగర్ సంగీతం సమకూర్చగా.. జె.యువ‌రాజ్ సినిమాటోగ్రఫీ అందించారు. ఎస్ఆర్ శేఖర్ ఎడిటర్ గా.. సాహి సురేష్ ఆర్ట్ డైరెక్టర్ గా వర్క్ చేశారు. ఈ చిత్రంలో సీనియర్ న‌రేష్‌ - జిషుసేన్ గుప్తా - శ్రీ‌ముఖి - అన‌న్య‌ - హ‌ర్ష‌వ‌ర్ధ‌న్ - ర‌చ్చ ర‌వి - మంగ్లీ - శ్రీ‌నివాస్ రెడ్డి తదితరులు ఇతర పాత్రలు పోషించారు.