మహేష్ బాబు పక్కా ఫ్యామిలీ పర్సన్. ప్రొఫెషన్ కు ఇచ్చినదాంతో సమానంగా.. ఆ మాటకు వస్తే అంతకు కొంచెం ఎక్కువగానే కుటుంబానికి ప్రాధాన్యత ఇస్తాడు. భార్యా పిల్లలతో కలిసి మహేష్ వేసినన్ని ఫారిన్ ట్రిప్పులు బహుశా మరే టాలీవుడ్ హీరో తిరగలేదంటే ఆశ్చర్యమేమీ లేదు. సహజంగా సినిమా షూటింగ్ సమయంలో బ్రేక్ వస్తేనే వెకేషన్ ప్లాన్ చేసేస్తుంటాడు మహేష్.
ఇప్పడు భరత్ అనే నేను మూవీతో గ్రాండ్ సక్సెస్ అందుకున్న మహేష్..విడుదల తర్వాత వారం కూడా అగ్రెసివ్ గా ప్రమోట్ చేసి.. సినిమాను దాదాపు హిట్టు తీరానికి తీసుకొచ్చాడు. సుదీర్ఘకాలంగా ఈ చిత్రంపై పని చేసిన మహేష్.. ఇప్పుడు తన ఫ్యామిలీతో కలిసి సరదా ట్రిప్ ప్లాన్ చేసుకున్నాడు. ఈ సారి ప్యారిస్ అంతా చుట్టేయాలన్నది సూపర్ స్టార్ ఐడియా. మొదట ప్యారిస్ లో ల్యాండ్ అయ్యి.. అక్కడి నుంచి మరికొన్ని యూరోపియన్ కంట్రీస్ లో కూడా చక్కర్లు కొడతారట. ఈ సందర్భంగా ఎయిర్ పోర్టు లో మహేష్ బాబుతో పాటు భార్య నమ్రతా మహేష్.. కొడుకు గౌతమ్.. కూతురు సితార కనిపించారు.
అక్కడి నుంచి కొన్ని ఫోటోలను తీసి సోషల్ మీడియాలో పోస్ట్ చేసింది నమ్రత. వీటిలో ప్రతీ ఫోటోలోను తండ్రి చేతిని వదిలిపెట్టకుండా పట్టుకున్న సితార కనిపిస్తుంది. తండ్రి అంటే ఈ పిల్లకు ఎంత ప్రాణమో.. కూతురు అంటే ఆ తండ్రికి ఎంత ఇష్టమో చెప్పకుండానే చూపించే అందమైన పిక్స్ ఇవి. నాన్నకూచిగా సితార కనిపిస్తుంటే.. తన గారాల పట్టితో భలే ఎంజాయ్ చేస్తున్నాడు మహేష్ బాబు.