ట్రైల‌ర్ తో దుమారం సృష్టించాల‌ట‌!

సంక్రాంతి పందెంలో నాలుగు సినిమాల రిలీజ్ లు ఇప్ప‌టికే క‌న్ ఫామ్ అయ్యాయి. మ‌రో రెండు మూడు సినిమాలు ఇదే సీజ‌న్ లో రిలీజ్ కి రెడీ అవుతున్నాయ‌న్న మాటా వినిపిస్తోంది. చూస్తుంటే 2020 పండ‌గ జోష్ మామూలుగా ఉండ‌ద‌ని అర్థ‌మ‌వుతోంది. ముఖ్యంగా సంక్రాంతి అల్లుళ్ల‌కు స్థానిక థియేట‌ర్ల‌లో సినిమాల ట్రీట్ ఓ రేంజులో ఉండ‌బోతోందని ఫుల్ క్లారిటీ వ‌చ్చేసింది.

సూప‌ర్ స్టార్ మ‌హేష్ న‌టించిన స‌రిలేరు నీకెవ్వ‌రు .. బ‌న్ని.. ర‌జ‌నీ సినిమాల‌తో పోటీప‌డుతూ జ‌న‌వ‌రి 11న థియేట‌ర్ల‌లోకి వ‌స్తోంది. ద‌ర్బార్.. అల వైకుంఠ‌పుర‌ములో.. స‌రిలేరు వ‌రుస‌గా రిలీజ‌వుతాయి. ఆ త‌ర్వాతా క‌ళ్యాణ్ రామ్ న‌టించిన ఎంత మంచివాడ‌వురా రిలీజ‌వుతోంది. అయితే పోటీలో ఎంద‌రు ఉన్నా మ‌హేష్ సినిమాపైనే ఘ‌ట్ట‌మ‌నేని అభిమానుల కాన్ స‌న్ ట్రేష‌న్. ఇప్ప‌టికే స‌రిలేరు పోస్ట‌ర్లు.. టీజ‌ర్.. పాట‌లు ప్ర‌తిదానికి స్పంద‌న బావుంది.

జ‌న‌వ‌రి 5న హైద‌రాబాద్ లో మెగాస్టార్ అతిధిగా భారీ ప్రీరిలీజ్ వేడుక జ‌ర‌గ‌నుంది. ఈ వేడుక కంటే ముందే ట్రైల‌ర్ ని రిలీజ్ చేయ‌నున్నారు. అయితే ట్రైల‌ర్ విష‌యంలో మాత్రం రాజీకి రావొద్ద‌ని అనీల్ రావిపూడికి మ‌హేష్ ఫ్యాన్స్ సూచిస్తున్నారు. సోష‌ల్ మీడియాలో ఇప్ప‌టికే ట్రైల‌ర్ గురించి ఆస‌క్తిక‌ర చ‌ర్చ సాగుతోంది. స‌రిలేరు ట్రైల‌ర్ తో దుమారం సృష్టించాల‌న్న‌ది ఫ్యాన్స్ ఆకాంక్ష‌. అందుకు త‌గ్గ‌ట్టే అనీల్ రావిపూడిపై ఒత్తిడి పెరుగుతోంది. మ‌రి మ‌హేష్ అభిమానుల్ని సంతృప్తి ప‌రిచే రేంజులో ట్రైల‌ర్ ని ఆవిష్క‌రిస్తాడా? ఈ ట్రైల‌ర్ తో త‌న లెవ‌లేంటో చూపిస్తాడా? అన్న‌ది చూడాలి. ఇక ఇప్ప‌టికే ఇండ‌స్ట్రీ టాప్ డైరెక్ట‌ర్ల‌లో అనీల్ స్థానం ఖాయ‌మైంది. త‌న పొజిష‌న్ మ‌రింత స్ట్రాంగ్ అవ్వాల‌న్నా ఈ సంక్రాంతి బ‌రిలో స‌రిలేరు నీకెవ్వ‌రు బ్లాక్ బ‌స్ట‌ర్ విజ‌యం సాధించాల్సి ఉంటుంది. ఇది సాధ్య‌మైతే వ‌రుస‌గా రెండు వ‌రుస‌ సంక్రాంతులు త‌న ఖాతాలో వేసుకుని సంక్రాంతి అల్లుడు అయిపోవ‌డం ఖాయం.