దీపావళికి మంచు లక్ష్మి వన్ అండ్ ఓన్లీ

దసరా కోసం అంతగా ఎగబడ్డ టాలీవుడ్ దర్శక నిర్మాతలు దీపావళి విషయంలో మాత్రం అంతగా ఆసక్తితో ఉన్నట్లు కనిపించడం లేదు. మామూలుగా ఓ పెద్ద పండగ అనగానే బెర్తులు ముందే ఖరారు చేసుకుంటారు. రిలీజ్ డేట్లు ఇచ్చేస్తారు. కానీ దీపావళి విషయంలో మాత్రం అలాంటి హడావుడేం కనిపించట్లేదు. దీపావళికి వస్తుందనుకున్న అల్లరి నరేష్ సినిమా ‘ఇంట్లో దయ్యం నాకేం భయం’ రెండు వారాలు వాయిదా పడి నవంబరు 11కు ఫిక్సయింది. అదే రోజు నిఖిల్ సినిమా ‘ఎక్కడికి పోతావు చిన్నవాడా’ కూడా రాబోతోంది. ప్రస్తుతానికి దీపావళి ముందు వీకెండ్లో విడుదలకు సిద్ధమైన సినిమా ఒక్కటే. అదే.. లక్ష్మీబాంబు.

తన కొత్త సినిమాను దీపావళి కానుకగా విడుదల చేయబోతున్నట్లు మంచు లక్ష్మి వెల్లడించింది. సినిమా దాదాపుగా పూర్తయిందని.. త్వరలోనే ఫస్ట్ కాపీ రెడీ అవుతుందని.. తన తమ్ముడు మంచు మనోజ్ ఆధ్వర్యంలో ‘లక్ష్మీబాంబు’ క్లైమాక్స్ ఫైట్ చిత్రీకరించామని.. అది అద్భుతంగా వచ్చిందని లక్ష్మి తెలిపింది. ఐతే తెలుగు సినిమాల హడావుడి పెద్దగా లేకపోయినా.. తమిళ డబ్బింగ్ సినిమాలు మాత్రం దీపావళికి తెలుగు రాష్ట్రాల్లో సందడి చేయబోతున్నాయి. కార్తి ‘కాష్మోరా’ తెలుగులోనూ మంచి అంచనాల మధ్య దీపావళికి విడుదల కానుంది. అలాగే విజయ్ ఆంటోనీ ‘సైతాన్’.. విశాల్ ‘ఒక్కడొచ్చాడు’.. ధనుష్ ‘ధర్మయోగి’ కూడా ఒకే రోజు.. అంటే ఈ నెల 29న ప్రేక్షకుల ముందుకు రానున్నాయి. డైరెక్ట్ తెలుగు సినిమా మాత్రం లక్ష్మీబాంబే.

Like Us on Facebook : https://www.facebook.com/Tupakidotcom/