టాలీవుడ్‌లో బోలెడంత మంది హీరోలు ఉన్నా మెగా హీరోల రేంజ్ వేరు. మెగాస్టార్ వేసిన పునాదులు ఆ తర్వాత ఎంట్రీ ఇచ్చిన వారికి స్ట్రాంగ్ బేస్ అవడంతో.. తెగ ఇరగదీసేస్తున్నారు. ఇప్పుడు సెట్స్ పై ఉన్న సినిమాలు.. అవి చేస్తున్న వ్యాపారం గమనిస్తే కళ్లు బైర్లు కమ్మడం ఖాయం.
టాలీవుడ్ క్రేజీయెస్ట్ ప్రాజెక్ట్ సైరా. 180 కోట్ల రూపాయల బడ్జెట్ తో.. మెగాస్టార్ కెరీర్ లో మైలురాయిగా నిలిచిపోనున్న ఈ చిత్రం.. 300 కోట్ల మేర బిజినెస్ చేస్తోందని ట్రేడ్ వర్గాలు చెబుతున్నారు. తెలుగుతో పాటు దేశవ్యాప్తంగా పలు భాషల్లో సైరా విడుదల కానుంది. పవన్ కళ్యాణ్ నటిస్తున్న అజ్ఞాతవాసి చిత్రం 100 కోట్ల బిజినెస్ చేసిందనే టాక్ ఉంది. శాటిలైట్.. డిజిటల్ వంటి ఇతర హక్కులను కూడా కలుపుకుంటే 150 కోట్లు దాటుతుందట ఈ లెక్క. రామ్ చరణ్ రంగస్థలం మూవీ థియేట్రికల్ రైట్స్ రూపంలో 80 కోట్ల బిజినెస్ జరిగిందని అంటున్నారు.
అల్లు అర్జున్ మూవీ నా పేరు సూర్యకు కూడా 80 కోట్లకు పైగానే ప్రీ రిలీజ్ బిజినెస్ జరుగుతోంది. సాయి ధరమ్ తేజ్- వినాయక్ కాంబినేషన్ లో రూపొందుతున్న మూవీకి ఇంటెలిజెంట్ టైటిల్ పరిశీలిస్తుండగా ఈ సినిమా బిజినెస్ 30 కోట్లుగా తేల్చారు. వరుణ్ తేజ్ నటిస్తున్న తొలి ప్రేమ మూవీ 20 కోట్ల వ్యాపారం చేసిందట. అల్లు శిరీష్ మూవీ ఒక్క క్షణంకు 15 కోట్ల వ్యాపారం జరిగిందని తెలుస్తోంది.
మొత్తం మీద మెగా హీరోల సినిమాల ప్రీ రిలీజ్ బిజినెస్ 600 కోట్లను దాటిపోయిందంటే.. ఇండస్ట్రీలో వీరి సత్తా ఏంటో అర్ధమవుతుంది.